Tags-Memories

vo kam-sinī kī shafīq yādeñ gulāb ban kar mahak uThī haiñ
udaas shab kī ḳhamoshiyoñ meñ ye kaun lorī sunā rahā hai

yādeñ rah jā.eñgī aur yādeñ bhī aisī jin kā
zahr ā.ankhoñ se rag-o-pai meñ utar jā.egā

ġham nahīñ jo chand yādeñ saath thiiñ
kar to lī dil kī hifāzat kam se kam

ab to bas sā.at-e-gum-karda kī yādeñ baaqī
ye vo jañgal hai ki jis meñ koī rastā hī na ho

kis kī yādeñ kis kā naam
dard kā rishta ḳhatm huā

bhūlī-bisrī huī yādeñ bhī rulā detī haiñ
be-sabab koī pareshān nahīñ hotā hai

chand yādeñ haiñ chand sapne haiñ
apne hisse meñ aur kyā hai jī

banā ke dā.era yādeñ simaT ke baiTh ga.iiñ
ba-vaqt-e-shām jo dil kā alaao jalne lagā

āñgan thā jab talak ye na dil ko lubhā sakā
yādeñ vatan kī aa.ī haiñ tark-e-vatan ke ba.ad

so ga.iiñ yādeñ bujh ga.ī ummīd
ghar meñ kitnā hai aaj sannāTā

duur khaḌā ho kar maiñ is liye pahroñ dekhtā rahtā huuñ
qaid bahut sī yādeñ haiñ mirī is vīrān havelī meñ

ḳhvāb kī kachchī malmal meñ jab āñkheñ lipTī hoñ
yādeñ oḌh ke sote rahnā achchhā lagtā hai

ik hasīñ yaad se vābasta haiñ lākhoñ yādeñ
ashk umañD aate haiñ jab lab pe tirā naam aa.e

jaag uTTheñgī purānī yādeñ
tū magar ḳhvāb-e-girāñ chāhegā

december kī havā ke sañg
kuchh anjān sī yādeñ

sahmī sahmī dhuāñ dhuāñ yādeñ
nazar aatī nahīñ hai rāh-e-visāl

gul kī āñkhoñ meñ machaltī huī yādeñ us kī
rang-o-āhang se badaltā huā shīsha dekhā

talḳh yādeñ dil se miTtī hī nahīñ
zindagī meñ chain kaise pāoge

dil meñ rah jā.eñge tanhā.ī ke qadmoñ ke nishāñ
apne pīchhe kitnī yādeñ chhoḌ kar jā.egī raat

tū mire paas thā yā terī purānī yādeñ
koī ik sher bhī tanhā nahīñ likhkhā maiñ ne