Tags-Ahbaab

bazm-e-ahbāb meñ hāsil na huā chain mujhe
mutma.in dil hai bahut, jab se alag baiThā huuñ

'munavār' pahle apne zauq par tanqīd farmā leñ
mire ahbāb nāhaq le rahe haiñ jā.eza merā

thake ahbāb āḳhir har tarah 'nātiq' ko samjhā kar
asar minnat samājat kā na kuchh la.anat malāmat kā

ab na vo ahbāb zinda haiñ na rasm-ul-ḳhat vahāñ
ruuTh kar urdu to dehlī se dakan meñ aa ga.ī

go rañj-e-judā.ī hai dil par be-vaqt hai ye daur-e-sāġhar
baiThe haiñ 'habīb' ahbāb magar ab tum bhī kah do ḳhair chale

ahbāb ne sau tarah hameñ ḳhvār kiyā
ġham itne diye ham ko ki bīmār kiyā

e.atirāf-e-auj kā jazba nahīñ ahbāb meñ
har taraqqī par taraqqī kī duā dene lage

tamām alfāz mar chuke haiñ tamām ahbāb jā chuke haiñ
ga.ī rutoñ ke sitam kā qissa sunā.eñ kaise kise sunā.eñ

toḌ kar rishta-e-ḳhulūs ahbāb
āñsuoñ kī tarah bikharte haiñ

ahbāb ho ga.e haiñ bahut mujh se bad-gumān
qaiñchī kī tarah chalne lagī hai mirī zabān

jis qadar aa.ī farāḳhī mire dil meñ 'tābish'
utnā hī tañg huā halqa-e-ahbāb mirā

ahbāb se kyā kahiye itnā na huā 'fānī'
jab zikr mirā aatā marne kī duā karte

aag bhaḌkī to dar-o-bām hue raakh ke Dher
aur dete rahe ahbāb dilāse kyā kyā

le ga.e shauq se marhūm kī har shai ahbāb
chhoḌ dī taaq ke uupar hī achchhā.ī us kī

ahbāb chārasāzi-e-vahshat na kar sake
zindāñ meñ bhī ḳhayāl bayābāñ-navard thā

saath ahbāb ke hāsid bhī zarūrī haiñ 'adīm'
ham suḳhan apnā sunāte jahāñ saare hote

dosh-e-ahbāb ye aage hai janāza merā
pīchhe sar pīTte armān chale aate haiñ

aur mire hamrāh, mire ahbāb
birhā ke maare hoñge

ḳhāmoshiyoñ ko izn-e-takallum jahāñ mile
vo bazm aur vo halqa-e-ahbāb chāhiye

hamāre Dūbne ke baad ubhreñge na.e taare
jabīn-e-dahr par chhaTkegī afshāñ ham nahīñ hoñge