Tags-Ahbaab

maiñ ne sab ahbāb ko ḳhush rakkhā jitnā ho sakā
yuuñ 'fidā' har din mujhe mismār ho jaanā paḌā

apnoñ kā shikva kis liye aa.e zabān par
ahbāb ke sitam sitam-e-ġhair to nahīñ

us kī begāna-ravī kā ye fusūñ to dekho
aaj ahbāb bhī aġhyār nazar aate haiñ

bazm-e-ahbāb meñ ho tum lekin
ho saf-e-dushmanāñ meñ shāmil tum

ḳhayāl-e-ḳhātir-e-ahbāb chāhiye har dam
'anīs' Thes na lag jaa.e ābgīnoñ ko

miyān-e-mahfil-e-ahbāb hai vo sham.a kī sūrat
ham us se lau lagā.e us ke parvānoñ meñ rahte haiñ

go taab nahīñ aur sitam sahne kī phir bhī
ahbāb kī har tarz-e-jafā mere liye hai

kaise aa.egā na sar-dard ko ārām 'adam'
mere ahbāb ko taqrīr kī bīmārī hai

maiñ jab na thā to mujh pe bahut qahqahe lage
ahbāb se sirisht-e-vafā kaun le gayā

majma-e-ahbāb kī rūdād 'sāqib' kyā kahūñ
ab vo aglī sohbateñ ḳhvāb-e-pareshāñ ho ga.iiñ

sirf tash.hīr hai shāyad mirā afsāna-e-ġham
aaj ahbāb meñ andāz haiñ begānoñ ke

ahbāb ko de rahā huuñ dhokā
chehre pe ḳhushī sajā rahā huuñ

'ehsān' apnā koī bure vaqt kā nahīñ
ahbāb bevafā haiñ ḳhudā be-niyāz hai

duur rah kar vatan kī fazā se jab bhī ahbāb kī yaad aa.ī
hijr meñ rah gayā dil taḌap kar aañkh fart-e-alam se bhar aa.ī

mire ahbāb saare shahr meñ haiñ
maiñ apne gaañv meñ kyā kar rahā huuñ

dafn kar ke qabr meñ jab jā chuke ahbāb dost
jo kabhī sochā na thā vo imtihāñ hone lagā

maiñ vo nādān ki DhūñDūñ koī apne jaisā
aur ahbāb the 'āzim' ki arastū nikle

shikast-e-ḳhātir-e-ahbāb hotī hai durust is se
tavajjoh meñ tirī ai yaar asar hai momyā.ī kā

nahīñ miTtī hai patthar kī lakīr ahbāb kahte haiñ
rahegā pā-e-but par naqsh apnī jab.ha-sā.ī kā

un ke kyuuñ ho ke rah ga.e 'kausar'
bazm-e-ahbāb ham se barham hai