Tags-Mohabbat

marte marte na haTe rāh-e-mohabbat se qadam
mujh meñ sau aib sahī ek hunar bhī dekho

qais-o-farhād kī tarah 'hāshim'
bas mohabbat meñ naam ho jaa.e

ye mohabbat kā fasāna bhī badal jā.egā
vaqt ke saath zamāna bhī badal jā.egā

mohabbat ke ye aañsū haiñ unheñ āñkhoñ meñ rahne do
sharīfoñ ke gharoñ kā mas.ala bāhar nahīñ jaatā

mujhe azīzān-e-man mohabbat kā koī bhī tajraba nahīñ hai
maiñ is safar meñ nayā nayā huuñ mujhe duāoñ meñ yaad rakhnā

bahut duur ab hai dil se yaad terī
mohabbat kā zamāna aa rahā hai

na jī ḳhush kar sakā terā karam bhī
mohabbat ko baḌā dhokā rahā hai

mohabbat tujh se thī qabl-az-mohabbat
kuchh aisā yaad mujh ko aa rahā hai

judā āġhāz se anjām se duur
mohabbat ik musalsal mājrā hai

mohabbat meñ 'firāq' itnā na ġham kar
zamāne meñ yahī hotā rahā hai

ġham-hā-e-mohabbat kā asar dekh rahā huuñ
bikhre hue dāman pe guhar dekh rahā huuñ

kabhī kabhī to mohabbat kī zindagī ke liye
ḳhud un ko ham ne ubhārā hai barhamī ke liye

sirf is dhun meñ ki ta.amīr-e-mohabbat sahal ho
jaane kin kin mushkiloñ kā sāmnā kartā huuñ maiñ

zindagī kis tarah basar hogī
dil nahīñ lag rahā mohabbat meñ

kyā hai anjām-e-mohabbat koī pūchhe ham se
jīte-jī ḳhaak meñ milne ke sivā kuchh bhī nahīñ

kaun sā dard hai jis kā nahīñ duniyā meñ ilaaj
lekin is dard-e-mohabbat kī davā kuchh bhī nahīñ

dekhā 'kaifī' ko to be-sāḳhta yuuñ bol uThe
ab to bīmār-e-mohabbat meñ rahā kuchh bhī nahīñ

tū kuchh to mire zabt-e-mohabbat kā sila de
hañgām-e-'fanā' dīda-e-pur-nam kī tarah aa

teġh-e-qātil jo mohabbat se lagī aa ke gale
taab ko us kī maiñ apnī rag-e-gardan samjhā

murattab kar liyā yuuñ ham ne afsāna mohabbat kā
kuchh un ke dil kī bāteñ haiñ kuchh apne dil kī bāteñ haiñ