Tags-Mohabbat

hai dil meñ agar us se mohabbat kā irāda
le lījiye dushman ke liye ham se vafā qarz

ḳhayāl kuchh bhī nahīñ hai tujh ko but-e-parīvash hamārā ham to
tirī mohabbat meñ naqd-e-jān-o-dil-o-jigar bhī luTā chuke haiñ

vo harf harf mukammal kitāb kar degā
varaq varaq ko mohabbat kā baab kar degā

jo dostoñ kī mohabbat se jī nahīñ bhartā
to āstīn meñ do-chār saañp paal ke rakh

mahak rahe haiñ ka.ī āsmān miTTī meñ
qadam zamīn-e-mohabbat pe dekh-bhāl ke rakh

ḳhud ko samjhā.ūñ ki duniyā kī ḳhabar-gīrī karūñ
is mohabbat meñ koī ek musībat hai mujhe

kahīñ afsāna-e-ishq-o-mohabbat
kahīñ rūdād-e-soz-o-sāz bhī hai

kin manziloñ luTe haiñ mohabbat ke qāfile
insāñ zamīñ pe aaj ġharīb-ul-vatan sā hai

haañ tū kahe to jaan kī parvā nahīñ mujhe
yuuñ zindagī se mujh ko mohabbat zarūr hai

aariz pe tere merī mohabbat kī surḳhiyāñ
merī jabīñ pe terī vafā kā ġhurūr hai

merī mohabbat zāmin hai shādābī kī
terī chāhat pattoñ ko piilā kar de

vo aise DhūñDne nikle haiñ 'bāqī'
mohabbat jaise raste meñ paḌī hai

ai sham.a bachānā dāman ko ismat se mohabbat arzāñ hai
ālūda-nazar parvānoñ ke jazbāt kī niyyat Thiik nahīñ

maiñ ne jab pyaar kī daulat se navāzā hai use
vo bhī do bol mohabbat ke sunāne aa.e

mohabbat kā nishāñ tak bhī zamāne meñ nahīñ miltā
uThā kar chiiz ye ai āsmāñ tū ne kahāñ rakh dī

mā.il-zabt bhī āmāda-e-fariyād bhī hai
dil giraftār-e-mohabbat bhī hai āzād bhī hai

marnā hai usī kā jo tujhe dekh ke mar jaa.e
jiinā hai usī kā jo mohabbat meñ jiyā ho

ek din Daalī thī buniyād mashaqqat kī yahāñ
ab ye sahrā bhī mohabbat se mujhe dekhtā hai

maut mohabbat kī var-mālā chitā svayamvar aag doshālā
pyaar piyā kī priit kā pyāsā naar anhār meñ kuud gayā

haiñ makīñ qarya-e-mohabbat ke
āsmāñ ke na ham zamīñ ke haiñ