Tags-Mohabbat

ham hī kyuuñ terī mohabbat meñ tamāshā ban ga.e
is hayāt-e-rañg-o-bū meñ the tamāshā.ī bahut

kisī ke ba.ad jo guzrī kisī kī hasrat meñ
vo ik sazā-e-mohabbat thī zindagī to na thī

hañsī hañsī meñ mire dil ko chhīnñe vaale
ye intiqām-e-mohabbat thī dilbarī to na thī

jahāñ meñ bashar un se ho be-ta.alluq koī maan le ham na māneñge us ko
ki chāroñ taraf haiñ yahī chaar chīzeñ mohabbat adāvat bhalā.ī burā.ī

jinheñ aish-o-rāhat kā armān hogā unheñ aish-o-rāhat kā armān hogā
tumhārī mohabbat meñ ham ne balā se vo paayā na paayā ye paa.ī na paa.ī

sabr mushkil thā mohabbat kā asar hone tak
jaan Thahrī na dil-e-dost meñ ghar hone tak

rakhte haiñ mohabbat ko taġhāful meñ chhupā kar
parvā hī to karte haiñ jo parvā nahīñ karte

jo log mohabbat meñ giraftār nahīñ haiñ
vo log haqīqat ke parastār nahīñ haiñ

duniyā meñ mayassar hai abhī jins-e-mohabbat
sad haif ki pahle se ḳharīdār nahīñ haiñ

maiñ ne ye kab kahā thā mohabbat meñ hai najāt
maiñ ne ye kab kahā thā vafādār hī raho

jab maiñ tumheñ nashāt-e-mohabbat na de sakā
ġham meñ kabhī sukūn-e-rifāqat na de sakā

kuchh aise moḌ pe bichhḌe the ham mohabbat meñ
mujhe bhī rañj use bhī koī malāl na thā

soch kar merī mohabbat meñ qadam rakhnā tum
is se aage to bahut lambā safar aa.egā

bazm-e-jānāñ meñ mohabbat kā asar dekheñge
kis se miltī hai nazar un kī nazar dekheñge

tere dar se mujhe itnī mohabbat ho ga.ī jānāñ
tire dar ke alāva sar kahīñ bhī ḳham nahīñ hotā

badaltī hī nahīñ qismat mohabbat karne vāloñ kī
tasavvur yaar kā jab tak 'fanā' paiham nahīñ hotā

yārab matā-e-dard mohabbat kī ḳhair ho
phir chashm-e-nāz silsila-jumbāñ hai āj-kal

lo aur suno kahte haiñ vo ham se bigaḌ kar
dekho hameñ dekho na mohabbat kī nazar se

mohabbat kā tirī banda har ik ko ai sanam paayā
barābar gardan-e-shāh-o-gadā donoñ ko ḳham paayā

mohabbat karne vaale kam na hoñge
tirī mahfil meñ lekin ham na hoñge