Tags-Mohabbat

ye chāroñ rāste
ham ne mohabbat kī kudāloñ se tarāshe the

afsāna mirā ḳhvāb-e-zuleḳhā-e-mohabbat
jalva hai tirā yūsuf-e-kan.ān-e-tamannā

jab bhī anjām-e-mohabbat ne pukārā ḳhud ko
vaqt ne pesh kiyā ham ko misāloñ kī tarah

zikr jab hogā mohabbat meñ tabāhī kā kahīñ
yaad ham ā.eñge duniyā ko havāloñ kī tarah

chalo ai zimma-dārān-e-mohabbat
farāz-e-dār par phir raushnī hai

mohabbat aah terī ye mohabbat raat bhar kī hai
tirī rañgīn ḳhalvat kī latāfat raat bhar kī hai

har mulāqāt adhūrī rahī is uljhan meñ
ya.anī iz.hār-e-mohabbat meñ pahal kaise ho

ai rāhrav-e-rāh-e-mohabbat ye samajh le
is raah meñ rāhat kā kahīñ naam nahīñ hai

lazzat-kash-e-āġhāz-e-mohabbat hai abhī dil
dīvāne ko andesha-e-anjām nahīñ hai

kyā aa.egā vo ahl-e-mohabbat kī nazar meñ
duniyā-e-mohabbat meñ jo badnām nahīñ hai

vo mohabbat kā rāsta kab hai
jis meñ patthar nahīñ babūl nahīñ

banjāre haiñ rishtoñ kī tijārat nahīñ karte
ham log dikhāve kī mohabbat nahīñ karte

tum ko shikva hai mire ahd-e-mohabbat se magar
tum ne paanī pe koī lafz kabhī likkhā hai

nigāh ko bhī mayassar hai dil kī gahrā.ī
ye tarjumān-e-mohabbat hai be-zabāñ na kaho

jise maiñ samajhtā huuñ qātil yahī hai
mohabbat isī se hai mushkil yahī hai

do din kī mohabbat ne dī ye hastī-e-jāved
ik pal bhī nahīñ kaTtī abhī umr paḌī hai

vo āñkheñ mast aur gulābī us kī ki un ko dekhe to dekhte hī
mai-e-mohabbat kā us kī dil ko ho kyā hī gahrā nasha do-bālā

mohabbat ko koī ghar de ḳhudāyā
bechārī aaj dar-dar ro rahī hai

qurbat ho ki duurī donoñ meñ ik kaif-e-mohabbat hotā hai
ye bhī hai isī mai-ḳhāne kī vo bhī hai isī mai-ḳhāne kī

ḳhudā kare yahīñ ruk jaa.e gardish-e-daurāñ
hai rāzdār-e-mohabbat sukūt-e-nīm-shabī