Tags-Mohabbat

ḳhazāna-e-zar-o-gauhar pe ḳhaak Daal ke rakh
ham ahl-e-mehr-o-mohabbat haiñ dil nikāl ke rakh

ham ahl-e-dil ne me.ayār-e-mohabbat bhī badal Daale
jo ġham har fard kā ġham hai usī ko ġham samajhte haiñ

tirā jalva nihāyat dil-nashīñ hai
mohabbat lekin is se bhī hasīñ hai

din-rāt mirī chhātī jaltī hai mohabbat meñ
kyā aur na thī jaagā ye aag jo yaañ daabī

ye saudā hai nigāhoñ kā tijārat dil kī hai lekin
mohabbat meñ ḳhasāra fā.eda kuchh bhī nahīñ hotā

ḳhvāb us kā to haqīqat se ziyāda hai bahut
merī uljhan bhī mohabbat se ziyāda hai bahut

maslahat ye hai ki iz.hār-e-mohabbat na karūñ
maut hai mere liye arz-e-tamannā kyā hai

shikva-e-karam kyuuñ hai vo agar karam karte
aur bhī mohabbat kī pyaas baḌh ga.ī hotī

ahl-e-dil vahāñ se bhī naġhma-zan guzar aa.e
lai jahāñ mohabbat kī TuuT hī ga.ī hotī

mirā dayār hai mehr-o-vafā kā gahvāra
adū-e-mehr-o-mohabbat kā hai magar madfan

rahegī mohabbat javāñ mere dil meñ
tirā dard jab tak satātā rahegā

dil qanā.at zarā sī kartā to
har mohabbat thī āḳhirī merī

ye kaif kaif-e-mohabbat hai koī kyā jaane
chhalak rahe haiñ nigāhoñ meñ dil ke paimāne

hazār terī mohabbat ne rahnumā.ī kī
guzar sake na maqām-e-junūñ se dīvāne

mohabbat ke safar meñ jab kahīñ par moḌ aa jaa.e
sunā ye hai vahīñ se hijr kā mausam nikaltā hai

mohabbat zindagī hai
mohabbat dil kī tiira sā.atoñ meñ raushnī hai

sehr kiyā e.ajāz kiyā hai dard kā sho.ala barf banā hai
tark-e-mohabbat ham ko mubārak kyuuñ nāhaq pachhtā.eñ aap

mohabbat merī baḌh kar aa ga.ī hai bad-gumānī tak!
mazā aa jaa.e ho jaa.eñ jo vo bhī bad-gumāñ mujh se

hai tamannā-e-sukūñ dil ko to 'qaisī' kī tarah
halqa-e-dard-e-mohabbat-zadagāñ meñ aa jā

ye duniyā ġham to detī hai sharīk-e-ġham nahīñ hotī
kisī ke duur jaane se mohabbat kam nahīñ hotī