Tags-Mohabbat

daaġh huuñ rashk-e-mohabbat se ki itnā betāb
kis kī taskīñ ke liye ghar se tū bāhar niklā

jannat ba-nigah tasnīm ba-lab andāz us ke ai shaiḳh na pūchh
maiñ jis se mohabbat kartā huuñ insāñ hai ḳhayālī huur nahīñ

detī hai tarġhīb naale kī ki har āzurda-dost
dushmanī kartī hai ab merī mohabbat mere saath

dil meñ dhaḌkan lab pe naale chashm-e-tar meñ ashk-e-ḳhūñ
kyā kahūñ kyā kar ga.ī terī mohabbat mere saath

tasavvur meñ koī aayā sukūn-e-qalb-o-jāñ ho kar
mohabbat muskurātī hai bahār-e-jāvedāñ ho kar

koī anjām-e-mohabbat kī jo bāteñ kartā
phuul ke chehre pe shabnam vo dikhā detā thā

hamārī mohabbat numū se nikal kar kalī ban ga.ī thī magar thī numū meñ
nigāhoñ se bāteñ kiye jā rahe the aTaktī jhijaktī huī guftugū meñ

gumāñ to ḳhair mohabbat kā thā par ab is se
ba-sū-e-rañj-talab vāsta nahīñ kuchh bhī

ye hasad hai ki mohabbat kī ijāra-dārī
darmiyāñ apnā bhī saaya nahīñ dekhā jaatā

ziist ke āsār ruḳhsat haiñ mohabbat dil meñ hai
kārvāñ jaatā hai mīr-e-kārvāñ manzil meñ hai

mohabbat meñ kamī aane lagī hai
use masrūfiyat khāne lagī hai

rañg ġhālib na sahī rañj-e-mohabbat hī sahī
ḳhush nazar aate haiñ naqqād navā par merī

yā ḳhudā dard-e-mohabbat meñ asar hai ki nahīñ
jis pe martā huuñ use merī ḳhabar hai ki nahīñ

phir mohabbat kā falsafa kyā hai
ye agar sab lahū kī vahshat hai

na aayā shaam bhī ghar phir ke apne
tamāshā.ī-e-bāzār-e-mohabbat

har lamha vo duniyā-e-mohabbat meñ taġhayyur
har saañs meñ vo rañg-e-digar yaad to hogā

mahsūs kar ke ham ne mohabbat kā har alam
ḳhvāb-e-subuk ko ḳhvāb-e-pareshāñ banā liyā

ek jiine kī lagan ek mohabbat kā lahū
na añdhere na ujāle se adāvat hai mujhe

bāñTte hī chāhiye rahnā mohabbat ke gulāb
dil ke gulshan ko kahā kis ne sajānā chāhiye

marte nahīñ ab ishq meñ yuuñ to ātish-e-furqat ab bhī vahī hai
taur junūñ ke badle lekin soz-e-mohabbat ab bhī vahī hai