Tags-Mohabbat

tū kuchh to mire zabt-e-mohabbat kā sila de
hañgām-e-fanā dīda-e-pur-nam kī tarah aa

aap se mujh ko mohabbat jo nahīñ hai na sahī
aur ba-qaul aap ke hone ko agar hai bhī to kyā

vafā parchhā.īñ kī andhī parastish
mohabbat naam hai mahrūmiyoñ kā

kisī darāz meñ rakhnā ki taaq par rakhnā
mire ḳhutūt-e-mohabbat sambhāl kar rakhnā

ḳhudā ke haath hai maut o hayāt ai 'rāsiḳh'
havas ke dar pe mohabbat ko mo'tabar rakhnā

'faiz' yuuñ rakhtā huuñ maiñ us kī mohabbat kā bharam
us ke hisse ke bhī ilzām pahan letā huuñ

hamāre ek dam par ek dam jo kuchh guzartī hai
mohabbat meñ kabhī aisā to ai hamdam nahīñ hotā

zinda haiñ mire ḳhvāb ye kab yaad hai mujh ko
haañ tark-e-mohabbat kā sabab yaad hai mujh ko

ġham-e-mohabbat meñ dil ke dāġhoñ se rū-kash-e-lāla-zār huuñ maiñ
fazā bahārīñ hai jis ke jalvoñ se vo harīf-e-bahār huuñ maiñ

maiñ kyā kahūñ kahāñ hai mohabbat kahāñ nahīñ
rag rag meñ dauḌī phirtī hai nashtar liye hue

kabhī ham dar-ba-dar bhī maañ kī aqlīm-e-mohabbat ke
sārīr-ārā.ī mutlaq baḳht-var sultān the lekin

mutma.in baiTh tū sayyād na kar qaid-e-shadīd
huuñ maiñ pāband-e-mohabbat tirā be-par bāñdhe

tum nañg jaan kar ise chāho to bhuul jaao
ham ko to ab bhī apnī mohabbat pe naaz hai

mohabbat ke bartāo sab chhoḌ baiThe
magar haañ satānā jalānā na chhoḌā

mujh ko dushman ke irādoñ pe bhī pyaar aatā hai
tirī ulfat ne mohabbat mirī aadat kar dī

hoñ tum ko mubārak la.al-o-gohar ham le ke ye daulat kyā karte
har shai ko fanā honā hai agar to dhan se mohabbat kyā karte

hameñ fareb-e-mohabbat qubūl hai lekin
jo khul ga.ī kabhī dil kī zabāñ to kyā hogā

koī to nikal aa.egā sarbāz-e-mohabbat
dil dekh rahe haiñ vo jigar dekh rahe haiñ

duniyā se uTh chukā thā mohabbat kā e'tibār
qaa.em kiye hue hai bharam kaun ham ki aap

karūñ un se laakh shikve magar un se shikva karnā
na tarīqa-e-mohabbat na rivāyat-e-javānī