Tags-Mohabbat

dil TuuT bhī jaa.e to mohabbat nahīñ miTtī
is raah meñ luT kar bhī ḳhasārā nahīñ hotā

dekhe haiñ mohabbat ke ham ne ye karishme bhī
ik baar chhupe gar vo sau baar nazar aa.e

mash.hūr-e-zamāna haiñ 'qatīl' us kī uḌāneñ
vo dām-e-mohabbat meñ giraftār hī kab thā

kyā zarūrī hai ye iqrār kī muhtāj rahe
ham mohabbat ko yuuñ lāchār kareñ bhī ki nahīñ

mohabbat meñ paa.e har ik raah se
hazāroñ hī raste nikalte hue

jo ek chhoTā sā dil hai 'salīm' siine meñ
vo āftāb mohabbat ke āsmān kā hai

ḳhabar bhī hai tujhe is daftar-e-mohabbat ko
jalāne jalne meñ kyā kyā zamāne lagte haiñ

is sādgī meñ rang-e-mohabbat zarūr hai
'anjum' tirī ġhazal ke ma.ānī likheñge log

rakhiye na mujh pe tark-e-mohabbat kī tohmateñ
jis kā ḳhayāl tak bhī nahīñ hai ravā mujhe

us ne is tarah mohabbat kī nigāheñ Dālīñ
ham se duniyā kā koī raaz chhupāyā na gayā

dekh ye jazb-e-mohabbat kā karishma to nahīñ
kal jo tere dil meñ thā vo aaj mere dil meñ hai

ba-kasrat sair kī hai har ravish gulzār-e-ālam kī
yahāñ rang-e-mohabbat hai bahut bū-e-vafā kam hai

mohabbat hī se is duniyā meñ saare kaam chalte haiñ
kisī se kyoñ kisī kī dostī dekhī nahīñ jaatī

uThā sakte nahīñ jab chuum kar hī chhoḌnā achchhā
mohabbat kā ye patthar is daf.a bhārī ziyāda hai

tirī ḳhushī se agar ġham meñ bhī ḳhushī na huī
vo zindagī to mohabbat kī zindagī na huī

vo ham haiñ ahl-e-mohabbat ki jaan se dil se
bahut buḳhār uThe aañkh shabnamī na huī

vo kuchh sahī na sahī phir bhī zāhid-e-nādāñ
baḌe-baḌoñ se mohabbat meñ kāfirī na huī

haiñ maze husn-o-mohabbat ke inhīñ ko hāsil
āsmāñ vāloñ se ye ahl-e-zamīñ achchhe haiñ

mohabbat dil-lagī jaano ho pyāre
vahī jaane hai dil jis kā lage hai

'bedam' us yaad ke maiñ sadqe us dard-e-mohabbat ke qurbāñ
jo jiinā bhī dushvār kare aur marnā bhī mushkil kar de