Tags-Mohabbat

dil mohabbat se bhar gayā 'beḳhud'
ab kisī par fidā nahīñ hotā

girā duuñ maiñ nafrat kī dīvāreñ saarī
mohabbat ko duniyā kā manshūr kar duuñ

hai ajab e.ajāz ye us kī mohabbat kā 'zafar'
jāgtī āñkhoñ meñ ḳhvāb-e-zindagī maujūd hai

mohabbat meñ butoñ kī mar miTe haiñ
rahā hai ik faqat huñkār baaqī

ain mumkin hai ki mujh hī meñ kamī ho lekin
sāmne aa.e mohabbat jise raas aa.ī hai

duur to haT jā.ūñ lekin fikr-e-mohabbat ne maarā
behad nāzuk rishta hai TuuT na jaa.e Dartā huuñ

hai hijr mohabbat kā taqāza dil-e-nādāñ
ab kar hī le tū pakkā irāda dil-e-nādāñ

ye mohabbat kī kahānī nahīñ martī lekin
log kirdār nibhāte hue mar jaate haiñ

biitī huī hayāt mohabbat kā tazkira
shām-o-sahar kī yaad hai shām-o-sahar ke ba.ad

ye tāsīr-e-mohabbat hai ki Tapkā
hamārā ḳhuuñ tumhārī guftugū se

husn ko khīñch to letā hai abhī tak lekin
vo asar jazb-e-mohabbat meñ kahāñ hai ki jo thā

ab un biite dinoñ ko soch kar to aisā lagtā hai
ki ḳhud apnī mohabbat jaise ik jhūTī kahānī ho

rahrav-e-rāh-e-mohabbat rah na jaanā raah meñ
lazzat-e-sahrā-navardī dūrī-e-manzil meñ hai

shauq se rāh-e-mohabbat kī musībat jhel le
ik ḳhushī kā raaz pinhāñ jāda-e-manzil meñ hai

kisī se ishq apnā kyā chhupā.eñ
mohabbat Tapkī paḌtī hai nazar se

ehsās-e-mohabbat se kisī gosha-e-dil meñ
jab choT ubhar aa.e to lagtā hai ki tum ho

ik garmī-e-jast-e-farāsat hai ik vahshat-e-pā-e-mohabbat hai
jis paañv kī tāqat jī meñ ho vo saath mire do-gām chale

koī 'āfāq' mohabbat kī himāyat meñ nahīñ
jaane kitne hī nishān us ke badan par aa.e

mumkin nahīñ ki gul kare vaisī shaguftagī
us sarzamīñ meñ tuḳhm-e-mohabbat maiñ bo chukā

rāsta de ki mohabbat meñ badan shāmil hai
maiñ faqat ruuh nahīñ huuñ mujhe halkā na samajh