Tags-Mohabbat

hai sham.a sar ke bal jo mohabbat meñ garm ho
parvāna apne dil se ye kahtā hai jal ke chal

un marīzān-e-mohabbat kī davā hai na duā
kar diyā jin pe karam terī masīhā.ī ne

mohabbat ham se us ko ho ga.ī to Thiik varna
ham apnī saakh rakhne ko adākārī kareñge

sunā hai us ko mohabbat duā.eñ detī hai
jo dil pe choT to khaa.e magar gila na kare

agar vafā pe bharosa rahe na duniyā ko
to koī shaḳhs mohabbat kā hausla na kare

hai mohabbat is vatan se apnī miTTī se hameñ
is liye apnā kareñge jān-o-tan qurbān ham

ābloñ kā shikva kyā Thokaroñ kā ġham kaisā
aadmī mohabbat meñ sab ko bhuul jaatā hai

sub.h hotī nahīñ mohabbat kī
raat kaTtī nahīñ javānī se

bahut shadīd tashannuj meñ mubtilā logo
yahāñ se duur mohabbat kā ek qarya hai

ḳhud vo āġhosh-e-kushāda hai jazīre kī tarah
phaile dariyāoñ kī mānind mohabbat us kī

ham ne dekhe haiñ vo aalam bhī mohabbat meñ 'hafīz'
āstāñ ḳhud jahāñ mushtāq-e-jabīñ hotā hai

go mohabbat se ham jī churāte rahe
zindagī bhar ye bad-zāt hotī rahī

itnī baar mohabbat karnā kitnā mushkil ho jaatā hai
insānoñ pe hijrat karnā kitnā mushkil ho jaatā hai

ye mohabbat bhī ek nekī hai
is ko dariyā meñ Daal aate haiñ

mohabbat nā-ravā taqsīm kī qaa.el nahīñ phir bhī
mirī āñkhoñ ko aañsū tere hoñToñ ko hañsī dī hai

na aayā ġham bhī mohabbat meñ sāzgār mujhe
vo ḳhud taḌap ga.e dekhā jo be-qarār mujhe

ik Tiis sī paiham paatā huuñ kyā is ko mohabbat kahte haiñ
mahsūs mujhe mīThā mīThā kuchh dard sā ai dil hotā hai

baat ab aa.ī samajh meñ ki haqīqat kyā thī
ek jazbāt kī shiddat thī mohabbat kyā thī

tū mil gayā hai to achchhā huā vagarna dost
kise ġharaz thī mohabbat meñ kāmrānī se

pahuñch chuke haiñ mohabbat meñ us jagah ham log
jahāñ yaqīñ nahīñ aatā yaqīñ-dahānī se