Tags-Mohabbat

inhīñ kā naam mohabbat inhīñ kā naam junūñ
mirī nigāh ke dhoke tirī nazar ke fareb

izzat zamīr mehnat dānish hunar mohabbat
lekin kabhī bikā hai kore ghaḌe kā paanī

kahā karte the vālid qais ke fart-e-mohabbat meñ
nahīñ ma.alūm kis jañgal meñ bar-ḳhurdār baiThe haiñ

had ho ga.ī thī ham se mohabbat meñ kufr kī
jaise ḳhudā-na-ḳhvāsta vo lā-sharīk thā

krishn aa.e yahāñ aa.e munjī yahāñ nānak aa.e yahāñ aa.e rusul-e-ḳhudā
sabhī ik dūsre se mohabbat kareñ saarī duniyā ko un kā ye farmān hai

jin se afsāna-e-hastī meñ tasalsul thā kabhī
un mohabbat kī rivāyāt ne dam toḌ diyā

haa.e ādāb-e-mohabbat ke taqāze 'sāġhar'
lab hile aur shikāyāt ne dam toḌ diyā

tum ko ulfat nahīñ mujh se ye kahā thā maiñ ne
hañs ke farmāte haiñ tum apnī mohabbat de do

mohabbat kā har ik sajda bhī me.arāj-e-mohabbat hai
maqām-e-arsh ab merī jabīñ ma.alūm hotī hai

kabhī shabnam kabhī taare kabhī tum muskurāte ho
mohabbat kī har ik saa.at hasīñ ma.alūm hotī hai

zarā tum haath rakkho yā ḳhalish dard-e-mohabbat kī
yahīñ ma.alūm hotī hai yahīñ ma.alūm hotī hai

har ik zarre meñ rañgīnī hai ki ḳhūnī mohabbat kī
tumhāre hī ye kūche kī zamīñ ma.alūm hotī hai

mohabbat kī maiñ kis manzil meñ huuñ allāhu-akbar ab
musībat bhī masarrat-āfrīñ ma.alūm hotī hai

mohabbat sulh bhī paikār bhī hai
ye shāḳh-e-gul bhī hai talvār bhī hai

mohabbat ġhazal hai ibādat ġhazal hai
ġhazal ma.arifat hai sharī.at ġhazal hai

dharā hī kyā hai mohabbat meñ be-kasī ke sivā
ham apne aap muqaddar banā.e baiThe haiñ

haañ kuchh bhī to derīna mohabbat kā bharam rakh
dil se na aa duniyā ko dikhāne ke liye aa

āñsuoñ kī qīmat jab motiyoñ se baḌh kar thī
vo mirī mohabbat kā aur hī zamānā thā

tabhī to maiñ mohabbat kā havālātī nahīñ hotā
yahāñ apne sivā koī mulāqātī nahīñ hotā

ā.īna-dār-e-mohabbat huuñ ki arbāb-e-vafā
apne ġham ko mire anjām se pahchānte haiñ