Tags-Mohabbat

mohabbat ke havāle DhūñDhtā hai
añdheroñ meñ ujāle DhūñDhtā hai

baḌhtī jaatī hai jo mashq-e-sitam us zālim kī
kuchh mohabbat mirī islāh magar detī hai

dil chiiz kyā hai dil se mohabbat jatā.e kaun
apnā jo ḳhud na ho use apnā banā.e kaun

un kī vo hayā vo ḳhāmoshī apnī vo mohabbat kī nazreñ
vo sunñe ko sab kuchh sunte haiñ ham kahne ko sab kuchh kahte haiñ

guloñ kī gar ināyat ho ga.ī to
unheñ ham se mohabbat ho ga.ī to

be-ḳhabar kāñToñ se thā ahl-e-mohabbat kā shu.ūr
paañv rakhne the zamīn-e-kū-e-jānāñ dekh kar

hai mohabbat kā agar donoñ taraf yaksāñ asar
vo pareshāñ kyuuñ nahīñ mujh ko pareshāñ dekh kar

kiyā hai poshīda ishq ham ne kisī se dar-parda hai mohabbat
paḌe hue bistar-e-alam par jo rote haiñ muñh chhupā chhupā kar

aisā nahīñ ki un se mohabbat nahīñ mujhe
ifshā-e-rāz-e-ishq kī jur.at nahīñ mujhe

sunā hai zinda huuñ hirs-o-havas kā banda huuñ
hazār pahle mohabbat-guzār maiñ bhī thā

mujhe samajhne kī koshish na kī mohabbat ne
ye aur baat zarā pechdār maiñ bhī thā

mujh ko kabhī bhī un se shikāyat huī nahīñ
shāyad isī liye to mohabbat huī nahīñ

ishq pyārā hai to ne.amat hai ġham-e-mahjūrī
in kā milnā hai mohabbat kā judā ho jaanā

duniyā-e-mohabbat ke andar nafrat kā añdherā jin se baḌhe
us daur-e-taraqqī ke aise jitne haiñ uThā kar toḌ diye

jis ne insāñ se mohabbat hī nahīñ kī 'tābish'
us ko kyā ilm ki pindār se aage kyā hai

kyā hasīñ ḳhvāb mohabbat ne dikhāyā thā hameñ
khul ga.ī aañkh to tābīr pe ronā aayā

dil gañvā kar bhī mohabbat ke maze mil na sake
apnī khoī huī taqdīr pe ronā aayā

mohabbat meñ vafā kī had jafā kī intihā kaisī
'mubārak' phir na kahnā ye sitam koī sahe kab tak

Duub kar marnā bhī uslūb-e-mohabbat ho to ho
vo jo dariyā hai to us ko paar honā chāhiye

kisī ke muntazir rahnā na darvāza khulā rakhnā
hameñ aayā nahīñ dil ko mohabbat meñ lagā rakhnā