Tags-Mohabbat

kare hai adāvat bhī vo is adā se
lage hai ki jaise mohabbat kare hai

ḳhāna-zādoñ ko kahāñ qaid-e-mohabbat se farāġh
ham vo bulbul haiñ yahīñ ḳhāk-e-gulistāñ hoñge

jo mohabbat kā na gur aap ne jaanā sāhab
phir to dushvār huā paḌhnā paḌhānā sāhab

bujh gayā terī mohabbat kā sharāra to kyā
Dūbte dekhe haiñ gardūñ ke sitāre maiñ ne

be-ruḳhī ahl-e-mohabbat se ravā tum ko nahīñ
sadqa-e-husn sahī mujh pe nigāhe gaahe

tū ne ye jaanā na ādāb-e-mohabbat kyā hai
har mulāqāt pe milne tirā aate rahnā

numūd-e-shām huī vaqt-e-iztirāb aayā
jahān-e-ishq-o-mohabbat meñ inqalāb aayā

maiñ ne maanā tirī mohabbat meñ
dil ke dil hī meñ rah ga.e armān

tūfān-e-mohabbat laakh uThe tūfān se lekin hāsil kyā
jo Duub ga.ī vo kashtī kyā jo haath aayā vo sāhil kyā

hai rāh-e-mohabbat rāh-e-razā andesha-e-sūd-o-ziyāñ kaisā
maiñ kyuuñ dekhūñ āsān hai kyā maiñ kyuuñ dekhūñ hai mushkil kyā

'zahīr'-e-ḳhasta-jāñ sach hai mohabbat kuchh burī shai hai
majāzī meñ haqīqī ke hue haiñ imtihāñ kyā kyā

zo.af se rāh-e-mohabbat meñ qadam uThte nahīñ
paañv jamte haiñ zamīñ par naqsh-e-pā ke saath saath

mere aañsū bhī bahe josh-e-mohabbat meñ 'azīz'
mere naale bhī rahe merī duā ke saath saath

jab huā zikr zamāne meñ mohabbat kā 'shakīl'
mujh ko apne dil-e-nākām pe ronā aayā

bas ek baar mohabbat se dekhne vaale
ye vo karam hai ki bār-e-digar kī baat na kar

kabhū ronā kabhū hañsnā kabhū hairān ho jaanā
mohabbat kyā bhale-chañge ko dīvāna banātī hai

ye rasm-e-inqitā.a ahd-e-ulfat ye hayāt-e-nau
mohabbat ro rahī hai aur tamaddun muskurātā hai

dar-o-dīvār se itnī mohabbat kis ke liye thī
agar is qaid ḳhāne se rihā honā thā mujh ko

mere siine meñ mohabbat kī tapish baaqī hai
merī sāñsoñ se tirā husn pighal saktā hai

silsila mohabbat kā sirf ḳhvāb hī rahtā
apne darmiyāñ āḳhir aa ga.ī haqīqat kyuuñ