Tags-Mohabbat

'faiz' yuuñ rakhtā huuñ maiñ us kī mohabbat kā bharam
us ke hisse ke bhī ilzām pahan letā huuñ

hai qā.eda kullī ye kū-e-mohabbat meñ
dil ġham jo huā hogā paidā na huā hogā

pā-laġhz-e-mohabbat se mushkil hai sambhal jaanā
us ruḳh kī safā.ī par is dil kā bahal jaanā

dam lene kī tāqat hai bīmār-e-mohabbat hai
itnā bhī ġhanīmat hai 'momin' kā sambhal jaanā

itnī jaldī mazdūr aurat āḳhir ye gale meñ bāñheñ kyuuñ
le der huī ab bhaag bhī jā bas itnī mohabbat kaafī hai

na sharh-e-shauq na taskīn jān-e-zār meñ hai
mazā jo apnī mohabbat ke e'tibār meñ hai

ġhālib aa.ī havas mohabbat par
ārzūoñ kā rañg kaalā hai

yahī tahsīl-e-mohabbat kā hai aalam tā-hāl
puḳhta karte haiñ hanūz ārzū-e-ḳhām ko ham

ye mohabbat kī hai qīmat ye mohabbat kā sila
ki hamāre hī liye ishq kā dastūr nahīñ

har dard-e-mohabbat se uljhā hai ġham-e-hastī
kyā kyā hameñ yaad aayā jab bhī tirī aa.ī

dekhe haiñ bahut ham ne hañgāme mohabbat ke
āġhāz bhī rusvā.ī anjām bhī rusvā.ī

ye bazm-e-mohabbat hai is bazm-e-mohabbat meñ
dīvāne bhī shaidā.ī farzāne bhī shaidā.ī

mohabbat kā un ko yaqīñ aa chalā hai
haqīqat bane jā rahe haiñ fasāne

rone lagtā huuñ mohabbat meñ to kahtā hai koī
kyā tire ashkoñ se ye jañgal harā ho jā.egā

ab harīf sab us ke talḳh roz o shab us ke
kāñpte haiñ lab us ke us ne kyuuñ mohabbat kī

na raas aayā mohabbat kā ye ḳhumār mujhe
maiñ be-qarār huuñ pal bhar nahīñ qarār mujhe

dilā rahā hai mohabbat kā phir yaqīñ mujh ko
chalā gayā jo mohabbat meñ kar ke ḳhaar mujhe

na kar sakūñgī maiñ 'ḳhanda' ab e'tibār us kā
pata hai kiyā hai mohabbat kā kārobār mujhe

kis ko har shai se mohabbat hai bhalā
kis ko ā.īna banāyā jaa.e

mohabbat ko hamārī ik zamāna ho gayā lekin
na tum samjhe ki kyā maiñ huuñ na maiñ samjhā ki kyā tum ho