Tags-Mohabbat

usī ke dam se zinda thī mohabbat
vahī ik shaḳhs kaisā ho gayā hai

muqtadir mohabbat kī shikva-sanj mahfil meñ
ḳhāmushī ko apnā.e pur-sipās ham hī the

palaT paḌā jo maiñ sar phoḌ kar mohabbat meñ
to rāsta isī dīvār se nikal aayā

kī mohabbat bhī to ik dushman-e-jāñ se 'ḳhāvar'
apnā dushman na koī tere barābar niklā

kuchh is adā se maiñ khoyā gayā mohabbat meñ
zamāna biit gayā hai bajā havās nahīñ

vo jo kahte the mohabbat nafratoñ kā hai javāb
un laboñ par rakh gayā nafrat bujhī shamshīr kaun

ye mo.ajiza bhī mohabbat kabhī dikhā.e mujhe
ki sañg tujh pe gire aur zaḳhm aa.e mujhe

shurūa ahl-e-mohabbat ke imtihān hue
ab un ko naaz huā hai ki ham javān hue

maiñ mohabbat kartā aur zinda rahnā bhuul chukī huuñ
aur khilaunoñ ke na.e kārobār kā lutf uThā rahī huuñ

paayā na ham ne suud mohabbat meñ yaar kī
is par bhī pahuñchtā hai zarar yak-na-shud do-shud

dil kī āvāz pe bai.at bhī to ho saktī hai
tum agar chāho mohabbat bhī to ho saktī hai

mohabbat ek kashtī muḳhtasar sī
tamannāoñ kā dariyā be-karāñ hai

mohabbat ke gharoñ ke kachche-pan ko ye kahāñ samjheñ
in āñkhoñ ko to bas aatā hai barsāteñ baḌī karnā

the bayābān-e-mohabbat meñ jo giryāñ aah ham
manzil-e-maqsūd ko pahuñche tarī kī raah ham

raushnī kā parda hai darmiyāñ tire mere aur pyaar jaarī hai
pyaar meñ mohabbat meñ ham na ḳhud ko badleñge aisī apnī yaarī hai

kalī kalī mutabassim hai ārzūoñ kī
qadam qadam pe mohabbat meñ kāmrāñ huuñ maiñ

navā navā meñ mirī zindagī machaltī hai
rabāb-e-husn-o-mohabbat pe naġhma-ḳhvāñ huuñ maiñ

fanā kī zad se hai mahfūz zindagī merī
shi.ār apnā mohabbat hai jāvedāñ huuñ maiñ

dekhe haiñ bahut ham ne hañgāme mohabbat ke
āġhāz bhī rusvā.ī anjām bhī rusvā.ī

jazbāt kī shiddat se nikhartā hai bayāñ aur
ġhairoñ se mohabbat meñ sañvartī hai zabāñ aur