Tags-Mohabbat

jis mohabbat ke laboñ se kabhī jhaḌte the gulāb
ab vahī lahja-e-āshufta-navā chāhtī hai

tilism-e-mohabbat hai āshiq kā haal
unheñ bhī ye qissa sunā.eñge ham

jis mohabbat kī zarūrat thī mire logoñ ko
us mohabbat se bhī baaz aayā huā rahtā thā maiñ

aur bhī dukh haiñ zamāne meñ mohabbat ke sivā
rāhateñ aur bhī haiñ vasl kī rāhat ke sivā

saḳhtiyāñ rāh-e-mohabbat kī na pūchh
har qadam ik taaza dushvārī baḌhī

ye paiham talḳh-kāmī sī rahī kyā
mohabbat zahr khā kar aa.ī thī kyā

tū yaad aayā tire jaur-o-sitam lekin na yaad aa.e
mohabbat meñ ye ma.asūmī baḌī mushkil se aatī hai

mohabbat ek ḳhushbū hai hamesha saath chaltī hai
koī insān tanhā.ī meñ bhī tanhā nahīñ rahtā

ye rañg-e-junūn-e-ishq hai kyā is rañg-e-junūñ ko kyā kahiye
maiñ jis se mohabbat kartā huuñ ḳhud us se kinārā kartā huuñ

raaz rakh rāz-e-mohabbat ai 'shakīl'
ye ġhazal mahfil meñ gaa.ī jā.egī

merā iz.hār-e-mohabbat na samajh paa.e aap
ye mire dukh ye mire dard to anjāne haiñ

abhī mī.ād baaqī hai sitam kī
mohabbat kī sazā hai aur maiñ huuñ

chauñk kar añgḌā.iyāñ lete haiñ naag
jaag 'antoni' mohabbat so rahī hai jaag jaag

azīz-o-aqribā par be-sabab vo zulm Dhātā hai
ḳhatā-vār-e-mohabbat to hamīñ haiñ sab se kyā matlab

kahā maano mohabbat meñ zarar hai
tabī.at ko sambhālo dil kidhar hai

kuchh yuuñ fanā huā huuñ mohabbat kī aag meñ
duniyā ko de chalā huuñ kahānī malāl kī

māhaul kī zulmāt meñ jis raah se guzre
qindīl-e-mohabbat kī ziyā chhoḌ ga.e ham

begāna rahe dard-e-mohabbat kī davā se
ye dard hī kuchh aur sivā chhoḌ ga.e ham

kar ga.ī umr akārat mirī haa.e haa.e
ik ġhalat-fahmī ki tū mujh ko mohabbat degā

maiñ to samjhā thā mohabbat kā bulāvā hai 'umar'
kyā ḳhabar thī vo mujhe maut kī dāvat degā