Tags-Mohabbat

vo burā vaqt mohabbat meñ na dekhe koī
jab mohabbat bhī tabī.at pe garāñ hotī hai

jāñ-nisārī se hai tauqīr-e-mohabbat lekin
dekhnā ye hai ki takmīl kahāñ hotī hai

jal-marā aag mohabbat kī ise kahte haiñ
jalnā dekhā na gayā sham.a kā parvāne se

tīrgī ke dhāgoñ meñ ḳhuun kī ravānī hai
dard hai mohabbat hai husn hai javānī hai

laġhzisheñ kaun sambhāle ki mohabbat meñ yahāñ
ham ne pahle bhī bahut bojh uThāyā huā hai

vo mohabbat nahīñ rahī 'jālib'
ham-safīroñ meñ ham-nashīnoñ meñ

ham to vo the ki mohabbat thā vatīra jin kā
pyaar se miltā to dushman ke bhī ho jaate the

mohabbat karne vaale dard meñ tanhā nahīñ hote
jo rūThoge kabhī mujh se to apnā dil dukhāoge

mohabbat aise kī 'bedār' saḳht mushkil hai
jo apnī jaan se guzre vo us kī chaah kare

hāsil kabhī jo us kī mohabbat na ho hameñ
pal-bhar kī bhī hayāt meñ rāhat na ho hameñ

ye aur baat hai ki laboñ se nahīñ ayaañ
ye to nahīñ ki tum se mohabbat na ho hameñ

mohabbat ibtidā tā-intihā irfān-e-kāmil hai
magar ham to unheñ paane se pahle kho.e jaate haiñ

maiñ shajar-kārī ke mausam meñ ugātī koī peḌ
aur mohabbat se parindoñ ko bulāyā kartī

jin ke sīnoñ meñ haiñ mahfūz mohabbat ke ḳhutūt
ham haiñ kuchh aisī dil-āvez kitāboñ kī tarah

karvaTeñ lete hue raat guzar jaa.e to kyā
sub.h hote hī mohabbat kā tarāna ho jā.ūñ

tirī ḳhushī se agar ġham meñ bhī ḳhushī na huī
vo zindagī to mohabbat kī zindagī na huī

to kyā ik hamāre liye hī mohabbat nayā tajraba hai
jise pochhiye vo kahegā ki jī haañ baḌā tajraba hai

vo apnī jagah ḳhush-gumāñ thī ki daa.im hai pahlī mohabbat
maiñ apne ta.iiñ mutma.in thā ki ye dūsrā tajraba hai

kisī aur ke tajarbe se koī fā.eda kyā uThā.eñ
mohabbat meñ har tajraba hī alag tarah kā tajraba hai

vo ik lamha mohabbat kā jab us ne hāl-e-dil pūchhā
vo ik lamha hazāroñ saal kī furqat pe bhārī thā