Tags-Mohabbat

na tarsā na tarsā mohabbat ke saaqī
pilā de pilā de sharāb-e-mohabbat

hue haiñ vo jis din se nārāz 'sherī'
taraqqī pe hai iztirāb-e-mohabbat

ham is udheḌ-bun meñ mohabbat na kar sake
aisā koī nahīñ magar aisā koī to ho

un ke andāz-e-mohabbat par nazar to Dāliye
ḳhat mujhe vo bhejte haiñ likh ke begāne kā naam

ek rishta bhī mohabbat kā agar TuuT gayā
dekhte dekhte shīrāza bikhar jaatā hai

kuchh hasīnoñ kī mohabbat bhī burī hotī hai
kuchh ye be-chain tabī.at bhī burī hotī hai

roz mat māñgiye miTTī kī mohabbat kā subūt
ham to ye jism usī ḳhaak kā chhāne hue haiñ

na shikva lab tak aa.egā na naala dil se niklegā
mire zabt-e-mohabbat kā bharam mushkil se niklegā

phūñke detī hai kalejā siine meñ
sho.ala ban ban kar mohabbat aap kī

agar mohabbat ke mudda.ī ho to ye ravayya ravā nahīñ hai
jo shikva hai rū-ba-rū nahīñ hai jo baat hai barmalā nahīñ hai

ajab nahīñ zahmat-e-vafā se mujhe kisī din najāt de de
yahī mirī be-zabāñ mohabbat jo dar-ḳhur-e-e'tinā nahīñ hai

jatā ke majbūrī-e-mohabbat umīd-e-mehr-o-vafā ke ma.anī
maiñ ḳhud huuñ apnā sukūn-e-dushman kisī kī koī ḳhatā nahīñ hai

mohabbat meñ kitne hī mansūr gum haiñ
ḳhudī bhī yahāñ be-ḳhudī ho rahī hai

koī jur.ateñ dekhe ahl-e-havas kī
mohabbat se bhī dil lagī ho rahī hai

un se kahā ki sidq-e-mohabbat magar daroġh
kahne lage ye sach hai ki har tarah par daroġh

varaq varaq pe mohabbat kī dāstāñ likh kar
'sarosh' soch rahā huuñ use paḌhegā kaun

ham mazāfāt se aa.e hue logoñ kā miyāñ
mas.ala rizq kā hotā hai mohabbat kā nahīñ

vaah re zaḳhm-e-mohabbat kī ḳhalish
jis ko dil ne rāhat-e-jāñ kar diyā

''balā-kashān-e-mohabbat pe jo huā so huā
jo mujh pe guzrī mat us se kaho, huā so huā

tark-e-mohabbat apnī ḳhatā ho aisā bhī ho saktā hai
vo ab bhī pāband-e-vafā ho aisā bhī ho saktā hai