Tags-Mohabbat

is tarah aate haiñ anjām-e-mohabbat ke ḳhayāl
ishratoñ meñ dil kī paiġhām-e-alam dete hue

yahīñ kī thī mohabbat ke sabaq kī ibtidā maiñ ne
yahīñ kī jur.at-e-iz.hār-e-harf-e-mudda.ā maiñ ne

kuchh aisā ho ki tasvīroñ meñ jal jaa.e tasavvur bhī
mohabbat yaad aa.egī to shikve yaad ā.eñge

darmān-e-mohabbat hai nishān-e-kaf-e-pā bhī
āñkhoñ se lagā kar kabhī dekho asar-e-ḳhāk

vo ḳhud-ġharaz hai mohabbat ke baab meñ 'tābish'
ki ek pal ke evaz ik zamāna chāhtā hai

chimTe raheñge dasht-e-mohabbat meñ sar-o-teġh
mahshar ta.iiñ ḳhālī na ye maidān rahegā

hameñ ḳhud se mohabbat ho ga.ī hai
hamāre ghar meñ ā.īna nahīñ hai

taufīq agar rahbar-e-manzil nahīñ hotī
me.arāj-e-mohabbat kabhī hāsil nahīñ hotī

jo soz-e-mohabbat se na ho sho.ala-ba-dāmāñ
vo sham.a kabhī raunaq-e-mahfil nahīñ hotī

jab tak na bhare rañg vafā mānī-e-fitrat
tasvīr-e-mohabbat kabhī kāmil nahīñ hotī

nā-kām mohabbat huuñ maiñ ai 'rāz' to kyā ġham
ye baat bhī har ek ko hāsil nahīñ hotī

mohabbat ke Thikāne DhūñDhtī hai
badan kī lā-makānī mausamoñ meñ

shāyad yahī kitāb-e-mohabbat ho lā-javāb
merī vafā ke saath hai terī jafā bahut

daulat se to zarā bhī mohabbat nahīñ mujhe
phir bhī mire nasīb meñ ye be-shumār hai

khīñch detā maiñ zamāne pe mohabbat ke nuqūsh
mere qabze meñ agar ḳhāma-e-shahpar hotā

mohabbat kā tum se asar kyā kahūñ
nazar mil ga.ī dil dhaḌakne lagā

ab naza.a kā aalam hai mujh par tum apnī mohabbat vāpas lo
jab kashtī Dūbne lagtī hai to bojh utārā karte haiñ

jahāñ lākhoñ mohabbat ke charāġhoñ se ujālā ho
'farah' raushan kisī dil kā vo dar ab tak nahīñ aayā

ye bhī karnā paḌā mohabbat meñ
ḳhud se Darnā paḌā mohabbat meñ

dasht-e-jāñ ke muhīb rastoñ se
phir guzarnā paḌā mohabbat meñ