Tags-Mohabbat

aatī hai nazar us meñ iḳhlās kī har sūrat
ā.īna hai ā.īna insān mohabbat kā

muddatoñ ḳhuub āzmātī hai
phir mohabbat samajh meñ aatī hai

apne bīmār-e-mohabbat ko bhī lete jaao
tum chale jaate ho pahlū meñ rahe dil kyūñkar

ḳhayāloñ meñ ġham-e-sūd-o-ziyāñ kuchh bhī nahīñ rahtā
mohabbat kī ye ḳhūbī sa.i-e-lā-hāsil se aatī hai

zindagī tujh se mohabbat to bahut hai lekin
ruuTh jaa.eñ na kahīñ terī nazar hone tak

har ik maqām-e-mohabbat bahut hī dilkash thā
magar ham ahl-e-mohabbat kashāñ kashāñ guzre

bahut aziiz hai mujh ko unheñ kyā yaad 'jigar'
vo hādsāt-e-mohabbat jo nā-gahāñ guzre

rone lagtā huuñ mohabbat meñ to kahtā hai koī
kyā tire ashkoñ se ye jañgal harā ho jā.egā

Thahrā jo zarā bahr-e-mohabbat pe maiñ jā kar
aa.ī lab-e-sāhil se yahī us ke sadā bhaag

ye fuġhāñ ye shor ye naale ye shevan the fuzūl
kyā batātī thī mohabbat aur kyā samjhā thā maiñ

husn hai vahm-e-mohabbat bhī gumāñ hai lekin
dil ye kahtā hai ki har vahm-o-gumāñ ko samjho

bas ek jurm-e-mohabbat pe us sitamgar ne
diye haiñ shām-o-sahar saikḌoñ azaab mujhe

har bachcha āñkheñ kholte hī kartā hai savāl mohabbat kā
duniyā ke kisī goshe se use mil jaa.e javāb to achchhā ho

mohabbat bāñTne nikle the patthar le ke ghar lauTe
bahut se dasht chhāne aur ho ke dar-ba-dar lauTe

mohabbat ke Thikāne DhūñDhtī hai
badan kī lā-makānī mausamoñ meñ

farhād bhī vāqif nahīñ ab koh-kanī se
be-kār haiñ farsūda mohabbat ke fasāne

haiñ zamāne meñ ajab chiiz mohabbat vaale
dard ḳhud bante haiñ ḳhud apnī davā hote haiñ

na is se milne kī hai tamannā na us ko paane kī aarzū hai
diyā mohabbat kā jal rahā hai jo jī meñ aa.e kare havā kā

maiñ to nākām mohabbat huuñ chalo rusvā huā
tau batā hai terā paimān-e-vafā kis ke liye

vo jā chukā hai to kyuuñ be-qarār itne ho
mohabbat us se karo jis ko bhuul sakte ho