Tags-Mohabbat

dāman-e-bād-e-bahārī hai garebāñ pe nisār
aatī hai bū-e-mohabbat tire dīvāne se

nigāh-e-qahr hogī yā mohabbat kī nazar hogī
maza de jā.egī dil se agar ai sīm-bar hogī

qahr kī āñkhoñ se tum ne hameñ jab bhī dekhā
ham ise ain mohabbat kī nazar samjhe haiñ

ne kaif-e-mohabbat kā aalam ne raqs-e-vafā ne mauj-e-karam
kyā vaj.h-e-javāz-e-bāda-kashī ai bāda-gusārāñ bhuul ga.e

mohabbat kā jab roz bāzār hogā
bikeñge sar aur kam ḳharīdār hogā

ye kār-e-mohabbat bhī kyā kār-e-mohabbat hai
ik harf-e-tamannā hai aur us kī pazīrā.ī

shiddat-e-shauq kā allāh re fusūñ uf re fareb
un kī nafrat pe mohabbat kā gumāñ hotā hai

yahī do kaam mohabbat ne diye haiñ ham ko
dil meñ hai yaad tirī zikr hai lab par terā

mohabbat itnī ri.āyat nahīñ diyā kartī
agar vo hañs ke bhī dekhe to iltifāt samajh

dhaḌak rahā hai ye kis shaḳhs kī mohabbat meñ
samajh meñ aa.eñ to dil ke muāmalāt samajh

barsoñ se huuñ maiñ zamzama-pardāz-e-mohabbat
aa.ī na javāban kabhī āvāz-e-mohabbat

ik dard mohabbat hai mirī har rag-o-pai meñ
har saañs hai ab merā ik āvāz-e-mohabbat

har-chand ki har bazm meñ Thukrā.ī ga.ī hai
āvāz-e-mohabbat hai phir āvāza-e-mohabbat

ma.amūr haiñ āvāz-e-mohabbat se fazā.eñ
mastūr hai go sāhib-e-āvāz-e-mohabbat

aa jaa.e zarā sīna-e-āfāq meñ garmī
ho jaa.e zarā sho.ala-zan āvāz-e-mohabbat

ye daur hai daur-e-havas is daur meñ ai dil
suntā nahīñ dil se koī āvāz-e-mohabbat

jis shaḳhs ke siine meñ hai dil kī jagah patthar
samjhegā vo kyā ma.anī-e-āvāz-e-mohabbat

is daur-e-tag-o-dau meñ vafā kaun sunegā
kitnī hī dil-āvez ho āvāz-e-mohabbat

tirī yaad meñ kab qayāmat na TuuTī tire ġham meñ kab hashr barpā na dekhā
ba-juz ik nigāh-e-masīhā-nafas ke mohabbat ke māroñ ne kyā kyā na dekhā

bahut sair kī bāġh-e-jannat kī ham ne magar kuchh mazā zindagī kā na dekhā
kisī dil meñ dard-e-mohabbat na paayā kisī dil meñ dāġh-e-tamannā na dekhā