Tags-Mohabbat

ḳhizāñ-rasīda bahāroñ kā zikr kyā ho 'kalīm'
hameñ to kuchh bhī mohabbat meñ sāzgār nahīñ

yahī manshūr-e-mohabbat hai ki vo paikar-e-zulm
jis ko nafrat se navāze maiñ use pyaar karūñ

pyaar mohabbat rishte naate piir faqīr
dekh ġharībī kyā kyā daulat khotī hai

badal jaate haiñ dil hālāt jab karvaT badalte haiñ
mohabbat ke tasavvur bhī na.e sāñchoñ meñ Dhalte haiñ

mohabbat jin ke dil kī dhaḌkanoñ ko tez rakhtī hai
vo aksar vaqt kī raftār se aage bhī chalte haiñ

mohabbat to talab kī raah meñ ik aisī Thokar hai
ki jis se zindagī kī ret meñ zamzam ubalte haiñ

mohabbat kā asar jaatā kahāñ hai
hamārā dard-e-sar jaatā kahāñ hai

dīvār-e-takalluf hai to mismār karo nā
gar us se mohabbat hai to iz.hār karo nā

kyuuñ phail chalā bazm-e-tamannā meñ dhuāñ sā
kyuuñ terī mohabbat kā diyā bujh sā gayā hai

jab se muñh ko lag ga.ī 'aḳhtar' mohabbat kī sharāb
be-piye āThoñ pahar madhosh rahnā aa gayā

ka.ī itihās ko ek saath dohrātī hai dīvālī
mohabbat par vijay ke phuul barsātī hai dīvālī

ajab andāz se rah rah ke muskātī hai dīvālī
mohabbat kī lahar nas nas meñ dauḌātī hai dīvālī

ye salīqa ki mohabbat ne sikhāyā hai hameñ
zaḳhm hañste hue khāte haiñ duā karte haiñ

kahīñ vo merī mohabbat meñ ghul rahā hī na ho
ḳhudā kare use ye tajraba huā hī na ho

apnī taqdīr thā barbād-e-mohabbat honā
mahfileñ aur bhī thiiñ aap kī mahfil ke sivā

laboñ pe phuul mohabbat ke jo sajā legā
use harīf bhī baḌh kar gale lagā legā

kuchh to ehsās-e-mohabbat se huiiñ nam āñkheñ
kuchh tirī yaad ke bādal bhī bhigo jaate haiñ

āshtī amn mohabbat ke parastār sabhī
jazba-e-mehr-o-mohabbat se haiñ sarshār sabhī

bas ik tark-e-mohabbat ke irāde
hameñ manzūr hote jā rahe haiñ

jab dil hī nahīñ hai pahlū meñ phir ishq kā saudā kaun kare
ab un se mohabbat kaun kare ab un kī tamannā kaun kare