Tags-Mohabbat

dil ke baare meñ maiñ tafsīl batā.ūñ tumheñ kyā
muḳhtasar ye ki mohabbat ko sazā jāntā hai

mohabbat mar ga.ī 'mushtāq' lekin tum na mānoge
maiñ ye afvāh bhī tum ko sunā kar dekh letā huuñ

ek ehsās-e-mohabbat ke sivā
hāsil-e-umr-e-ravāñ kuchh bhī nahīñ

mohabbat kar ke sharminda nahīñ huuñ
maiñ is duniyā kā bāshinda nahīñ huuñ

dekh mohabbat kā dastūr
tū mujh se maiñ tujh se duur

kam ḳhaak ġharībān-e-mohabbat ko na jaano
uTTheñge isī ḳhaak se kal ḳhāk-ba-sar aur

duniyā meñ mohabbat kī kamī hai to balā se
ābād mohabbat kareñ aa shām-o-sahar aur

zideñ mohabbat se aisī aa.iiñ ḳhayāl rakkhā na apne ghar kā
butoñ ne ka.abe ko muft Dhāyā kisī ke dil ko dukhā dukhā kar

ham zamāne meñ mohabbat ke bhikārī Thahre
dost haiñ sab ke magar dushman-e-jāñ haiñ apne

kaam karte haiñ roz-o-shab sāhab
ham mohabbat ke kār-ḳhāne meñ

vaqt ham ko ye bure din na dikhātā ai kaash
ham bhī uTh jaate zamāne se mohabbat kī tarah

har ik ba-nām-e-mohabbat ḳhulūs kī ḳhātir
har ek dūsre ke vāste musībat thā

lapakte sho.aloñ meñ jalte rahe ḳhutūt magar
ik ek harf pukārā hai maiñ mohabbat thā

banānā ret ke ghar tum ko yaad to hogā
phir in gharoñ meñ mohabbat kī sīpiyāñ rakhnā

log ab mohabbat meñ kārobār karte haiñ
dil bachā ke rakhte haiñ jaañ shikār karte haiñ

ban gayā soz-e-mohabbat 'farhat'
ik harīf ātish-e-mīnā.ī kā

zindagī naam hai mohabbat kā
marg anjām hai mohabbat kā

kis tarah nikle baaġh se bulbul
bū-e-gul daam hai mohabbat kā

ḳhaas mujh par nahīñ nigāh-e-karam
qā.eda aam hai mohabbat kā

ruuh ke vāste tan-e-ḳhākī
ek ehrām hai mohabbat kā