Tags-Mohabbat

phūñkā hai kis ne gosh-e-mohabbat meñ ai ḳhudā
afsūn-e-intizār tamannā kaheñ jise

mohabbat kahāñ ye to bechārgī hai sitam bhī saheñ phir karam is ko samjheñ
ye jabr is liye kar liyā hai gavārā ki is ke sivā koī chārā na dekhā

ek ke ghar kī ḳhidmat kī aur ek ke dil se mohabbat kī
donoñ farz nibhā kar us ne saarī umr ibādat kī

shohrat ke gahre dariyā meñ Duube to phir ubhre nahīñ
jin logoñ ko apnā samjhā jin logoñ se mohabbat kī

kahīñ zarra kahīñ sahrā kahīñ qatra kahīñ dariyā
mohabbat aur us kā silsila yuuñ bhī hai aur yuuñ bhī

us mauj ko baḌhte baḌhte phir sailāb-e-mohabbat banñā hai
us sail-e-ravāñ ke dhāre ko is mulk kī qismat banñā hai

tirī zālim mohabbat ne jise bad-nām kar Daalā
usī mazlūm kī rusvā javānī dekhte jaao

is tarah kartā huuñ puujā terī
tū mohabbat kā ḳhudā ho jaise

dimāġh ahl-e-mohabbat kā saath detā nahīñ
use kaho ki vo dil ke kahe meñ aa jaa.e

ā.īna bhī hairat se mohabbat kī hue ham
par sair ho is shaḳhs kā dīdār na paayā

rah-e-ḳhulūs-e-mohabbat ke hādsāt-e-jahāñ
mujhe to kyā mire naqsh-e-qadam miTā na sake

maiñ na bhūlūñ ġham-e-ishq kā ehsāñ 'vahshat'
un ko paimān-e-mohabbat jo nahīñ yaad na ho

mohabbat kyā salīb-e-zindagī hai
dil-e-rusvā kā hāsil ḳhud-kushī hai

tabsira itnā hī kaafī hai mohabbat ke liye
muḳhtasar saude meñ nuqsān baḌā rahtā hai

mohabbat ke karam haiñ karb aur añgāre yādoñ ke
agar hotī na ye zālim to phir jalnā nahīñ hotā

nāseh! ḳhayāl-e-tark-e-mohabbat se fā.eda
vāqif nahīñ haiñ kyā alam-e-jāvedāñ se ham

har ik dil meñ ho intihā kī mohabbat
maiñ is daur kī ibtidā chāhtā huuñ

phal jaa.e mohabbat to mohabbat hai mohabbat
aur raas na aa.e to musībat hai mohabbat

sarmāya-e-dīvana-e-ulfat hai mohabbat
ai ulTe hue dil tirī qīmat hai mohabbat

hai ham hī talak ḳhair ġhanīmat hai mohabbat
ho jaa.e unheñ bhī to qayāmat hai mohabbat