Tags-Mohabbat

ik na.e moḌ pe hai dard-e-mohabbat apnā
dārū-e-dard hai ḳhud dard-e-jahāñ aaj kī raat

hāsil-e-ishq-o-mohabbat ġham-e-hijrāñ na sahī
vo kisī shoḳh ke bhūle hue paimāñ hoñge

tamannā naañv ban kar bah rahī hai
mohabbat ek sāhil ho ga.ī hai

Daal dī sāqī-e-kausar ne azal se 'rif.at'
bāda-e-ishq-o-mohabbat mire paimāne meñ

mirī mohabbat ke rāz-dāñ ne ye kah ke lauTā diyā mirā ḳhat
ki bhīgī bhīgī sī āñsuoñ meñ tamām gunjalak ibārateñ haiñ

nek-nāmī meñ dilā firqa-e-ushshāq haiñ ishq
hai vo badnām mohabbat meñ jo badnām nahīñ

is rāh-e-mohabbat meñ to āzār mile haiñ
phūloñ kī tamannā thī magar ḳhaar mile haiñ

'nāsir' ye tamannā thī mohabbat se mileñge
vo jab bhī mile bar-sar-e-paikār mile haiñ

in se ummīd na rakh haiñ ye siyāsat vaale
ye kisī se bhī mohabbat nahīñ karne vaale

nashāt-e-zīst kī zāmin hai ab yād-e-mohabbat hī
yahī ḳhud ishq ke zaḳhmoñ kā marham hotī jaatī hai

mohabbat hī se kholo tum dil-e-'mullā' kā darvāza
yahī is ke liye ab ism-e-āzam hotī jaatī hai

aaj dukkān pe nīlām uThegā un kā
tū ne jin gītoñ pe rakhī thī mohabbat kī asaas

dekh dariyā hai kināre ko sambhāl
ye mohabbat ye mohabbat kā zavāl

zaḳhm bigḌe to badan kaaT ke pheñk
varna kāñTā bhī mohabbat se nikāl

zabt karnā na kabhī zabt meñ vahshat karnā
itnā āsāñ bhī nahīñ tujh se mohabbat karnā

āgara shahr meñ mohabbat kā
ek mīnār jagmagātā hai

ik mohabbat thī jo thī tartīb meñ
varna shai thī kab koī tartīb meñ

kuchh tamannā hai to bas ye hai mohabbat meñ mujhe
mere hāthoñ meñ mire yaar kā dāman hotā

tū agar apnā banā letā mujhe mere sanam
kyuuñ mohabbat mirā chāk-e-garebāñ hotā

hairat se tak rahā hai jahān-e-vafā mujhe
tum ne banā diyā hai mohabbat meñ kyā mujhe