Tags-Mohabbat

vaqt kā karne lage ham ehtirām
har mohabbat āḳhirī mahsūs kī

mahram-e-rāz-e-haram huuñ vāqif-e-but-ḳhāna huuñ
maiñ rah-o-rasm-e-mohabbat kā magar dīvāna huuñ

dil un kī mohabbat kā jo dīvāna lage hai
ye aisī haqīqat hai jo afsāna lage hai

malāl-e-tark-e-marāsim to kuchh nahīñ lekin
is ehtiyāt-e-mohabbat kī daad detā huuñ

tabāhiyāñ bhī mohabbat ko raas aa na sakīñ
sitam-zarīfī-e-fitrat kī daad detā huuñ

gāliyāñ to haiñ mohabbat kī ibārat pyāre
kab maiñ kahtā huuñ ki likh kar mujhe dushnām na bhej

yaad bhī abr-e-mohabbat kī tarah hotī hai
ek saayā sā chalā jaatā hai rahgīr ke saath

ze-farq-tā-ba-qadam rūp-rañg kī jhankār
tamām mehr-o-mohabbat tamām bos-o-kanār

āzār-e-mohabbat hai aur āzār hai ai 'josh'
jo bā.is-e-āzār kabhī ho nahīñ saktā

ham rāh-e-mohabbat se is tarah se guzreñge
jo naqsh-e-qadam hogā tasvīr-e-vafā hogā

mere afsāna-e-hastī meñ hai tū bhī shāmil
mirī nāshād mohabbat kī kahānī likh de

bhūle se mohabbat kar baiThā, nādāñ thā bechārā, dil hī to hai
har dil se ḳhatā ho jaatī hai, bigḌo na ḳhudārā, dil hī to hai

chāhateñ bāñTī haiñ duniyā ko mohabbat dī hai
maiñ ne kab yūñhī sambhālā hai ḳhazāna dil kā

mohabbat ḳhud-farāmoshī se guzrī ab ye aalam hai
ki ik aalam tamāshā.ī hai apnī be-shu.ūrī kā

maḳhlūq ko tumhārī mohabbat meñ ai buto
īmān kā ḳhayāl na islām kā lihāz

agar ham vāqa.ī kam-hausla hote mohabbat meñ
maraz baḌhne se pahle hī davā tabdīl kar lete

vo jis ne khaa.e haiñ dhoke mohabbat kar ke apnoñ se
vahī to ḳhuun ko paanī guloñ ko ḳhaar bolegā

koī maane na maane par mohabbat hī haqīqat hai
abhī maiñ kah rahā huuñ kal yahī aḳhbār bolegā

agar ḳhāmosh kar bhī dī zabāñ rasm-e-mohabbat meñ
sar-e-mahfil magar 'shāyān' kā kirdār bolegā

ham agar maare ga.e apnī javānī meñ kahīñ
naam likh denā mohabbat kī kahānī meñ kahīñ