Tags-Mohabbat

dekhā na kārobār-e-mohabbat kabhī 'hafīz'
fursat kā vaqt hī na diyā kārobār ne

ḳhud-baḳhud rāz-e-mohabbat munkashif kartā rahā
vo gulābī aks jo raqsāñ tire gāloñ pe thā

ham anā-ḳhvār anā-dār anā vaale haiñ
ham mohabbat ko muqaddam nahīñ karne vaale

aa tujh ko banā duuñ rashk-e-chaman mīzān-e-mohabbat meñ tul ke
aariz ko guloñ kī ra.anā.ī bal zulf ko baḳhshūñ sumbul ke

har aan umañgoñ ke badalte rahe tevar
har aan mohabbat meñ na.ī raah chale haiñ

ham haiñ ki hue halqa-e-zanjīr-e-mohabbat
baaqī to ga.e chhūT giraftār tumhāre

zabānoñ par ulajhte dostoñ ko kaun samjhā.e
mohabbat kī zabāñ mumtāz hai saarī zabānoñ meñ

mirī mohabbat bhī ḳhaas hai kyūñki ḳhaas huuñ maiñ
so aam logoñ meñ zikr is kā nahīñ karūñgā

ai sham.a bahā ashk chhupā rāz-e-mohabbat
ḳhākistar-e-parvāna hai betāb lagan meñ

kitne hasīñ ho māshā-allāh
tum pe mohabbat ḳhuub jachegī

mujh se to dil bhī mohabbat meñ nahīñ ḳharch huā
tum to kahte the ki is kaam meñ ghar lagtā hai

kamar kī justujū se kyā dahan kī aarzū kyuuñ ho
mohabbat ke marāhil meñ adam yuuñ bhī hai aur yuuñ bhī

ye to ādāb-e-mohabbat ke munāfī hai 'atā'
rauzan-e-dīvār se bairūn-e-dar bhī dekhnā

hamesha ahd hote haiñ nahīñ milne ke ab un se
vo jab aa kar lipaTte haiñ mohabbat aa hī jaatī hai

hisāb-e-dostāñ dar-e-dil taqāzā hai mohabbat kā
masal mash.hūr hai ulfat se ulfat aa hī jaatī hai

ye lag rahā hai mohabbat ke pahle ziine par
ki jis maqām pe huuñ ye maqām āḳhirī hai

ai jafākār tire ahd se pahle to na thī
kasrat is darja mohabbat ke pashīmānoñ kī

kisī kā apnā mohabbat meñ kuchh nahīñ hotā
ki mushtarak haiñ yahāñ suud bhī ḳhasāre bhī

na bhūlegā na bhūlegā qayāmat tak na bhūlegā
kisī kā vo mohabbat se mire siine pe sar rakhnā

kyoñ mohabbat kar rahe haiñ aap bas ik maiñ se mil kar
aur kitne maiñ na jaane mere bhītar pal rahe haiñ