Tags-Mohabbat

zamāna yaad kare yā sabā kare ḳhāmosh
ham ik charāġh-e-mohabbat jalā.e jaate haiñ

'nushūr' aap ke ash.ār-e-dard kyā kahnā
kisī kī bazm-e-mohabbat meñ gaa.e jaate haiñ

sadiyoñ meñ koī ek mohabbat hotī hai
baaqī to sab khel tamāshā hotā hai

ulfat meñ tirī ai but-e-be-mehr-o-mohabbat
aayā hameñ ik haath se taalī kā bajānā

ham achchhā thā jo bahr-e-parda-poshī
mohabbat kā tirī charchā na karte

mire andar kahīñ par kho ga.ī hai
mohabbat ḳhaak meñ luthḌī huī hai

mujh ko rakhnā hī thā ādāb-e-mohabbat kā ḳhayāl
mere shāne pe kal us shoḳh kā sar ho ki na ho

āḳhrī marhala aayā hai mohabbat kā ab
ab diyā ḳhud hī bujhā kar bhī dikhā.e ḳhud ko

kahīñ par baiTh kar sunsān rasta shaam tak dekho
mohabbat apne Darāme meñ yahī ik rol detī hai

zulm Dhaao yā banā Daalo mohabbat kā safīr
ham nahīñ rahte kahīñ dab ke tamāshā kyā hai

nafas ke loch ko ḳhanjar banānā chāhtī hai
mohabbat apnī tezī āzmānā chāhtī hai

karvaTeñ lete haiñ naġhmāt-e-mohabbat is meñ
dil kī āvāz se behtar koī āvāz nahīñ

ye mehr-o-māh bhī uḌte hue sharāre haiñ
ki arsh tak hai mohabbat ke pech-o-tāb kī aañch

hai ibārat jo ġham-e-dil se vo vahshat bhī na thī
sach hai shāyad ki hameñ us se mohabbat bhī na thī

ḳhabar kī thī gulistān-e-mohabbat meñ bhī ḳhatre haiñ
jahāñ girtī hai bijlī ham usī Daalī pe jā baiThe

mohabbat vaale haiñ kitne zamīñ par
akelā chāñd hī be-nūr hai kyā

aulād kī tarah hai mohabbat kā mujh pe haq
jab tak kisī kā bojh uThāne kī umr hai

ranjisheñ dil meñ rakhnā burī baat hai kyuuñ na phir ibtidā se mohabbat kareñ
aao pahle sañvāreñ shab-e-ġham ko ham vaqt hogā to ḳhud bhī sañvar jā.eñge

kah rahī hai ye mare dil se mohabbat us kī
huuñ to iksīr magar mujh meñ asar kuchh bhī nahīñ

raas aa jā.egī jis ko vo use chāheñge
phir mohabbat meñ sabhī kuchh hai agar kuchh bhī nahīñ