Tags-Mohabbat

mujh ko tum se baḌī mohabbat hai
mere jazbe kā ehtirām karo

usī jahāñ kī mohabbat meñ mar ga.e 'ḳhāvar'
kiyā na kaam koī tum ne is jahāñ ke liye

zahe qismat ki saaye daar bhī hai bā samar bhī
mire sar par mohabbat kā shajar kitnā hasīñ hai

nahīñ hai 'nāz' kam jannat se merā āshiyāna
mohabbat se muzayyan merā ghar kitnā hasīñ hai

zikr-e-shab-e-firāq se vahshat use bhī thī
merī tarah kisī se mohabbat use bhī thī

rakhā jo us ne mohabbat se haath kāñdhe par
jo dil meñ dard thā mere tamām bhuul gayā

mohabbat meñ kyā kyā na kuchh jaur hogā
abhī kyā huā hai abhī aur hogā

ye mehrbānī bhī ham pe rahī mohabbat kī
ki ḳhaas rahte hue bhī bahut hī aam the ham

dil-e-hazīñ kā ajab haal hai mohabbat meñ
koī ġhazab hī na Dhā de ye nā-tavān kahīñ

maiñ dāstān-e-mohabbat ise sunā aayā
kahīñ kā zikr thā lekin kiyā bayān kahīñ

kisī ke ahd-e-mohabbat kī yaad baaqī hai
baḌe hasīn sahāroñ se khel saktā huuñ

kabhī is se mohabbat kī kabhī us se shikāyat kī
ka.ī chheḌe haiñ kārobār lekin dil nahīñ lagtā

piitā huuñ maiñ sharāb-e-mohabbat to kyā huā
piitā hai ye sharāb to parvardigār bhī

soī soī huī ā.ankhoñ meñ chhalakte hue jaam
khoī khoī huī nazroñ meñ mohabbat kā payām

mire mālik mujhe is ḳhaak se be-ghar na karnā
mohabbat ke safar meñ chalte chalte thak gayā huuñ maiñ

ek qatra huuñ magar sail-e-mohabbat se tire
ho sake jo na samundar se bhī kar jā.ūñgā

maiñ andalīb huuñ ik gulshan-e-mohabbat kā
so maiñ bhī kuchh mire sayyād karne vaalā huuñ

ġham-e-mohabbat satā rahā hai ġham-e-zamāna masal rahā hai
magar mire din guzar rahe haiñ magar mirā vaqt Tal rahā hai

rasm-o-rāh-e-dahr kyā josh-e-mohabbat bhī to ho
TuuT jaatī hai har ik zanjīr vahshat bhī to ho

sab tamannā.eñ hoñ puurī koī ḳhvāhish bhī rahe
chāhtā vo hai mohabbat meñ numā.ish bhī rahe