Tags-Mohabbat

vo ḳhud kaheñ to sharh-e-mohabbat bayāñ karūñ
naġhma baġhair saaz sunāyā na jā.egā

behtar yahī hai zikr-e-mohabbat na chheḌiye
naqsha bigaḌ gayā to banāyā na jā.egā

hasīñ ma.asūm hoñToñ par mohabbat ke sabaq taaza
kabhī to aadmī kī fitrat-e-chālāk badlegī

itnā karam bhī jabr-e-mohabbat kā kam nahīñ
ghuT ghuT ke marne vāloñ ko jiinā sikhā gayā

ḳhushī se baḌh ke qadam mere ābloñ ne liye
koī jo raah mohabbat meñ ḳhār-zār aayā

mohabbat naġhma bhī hai saaz bhī hai
shikast-e-sāz kī āvāz bhī hai

mohabbat yuuñ to hai ik lafz-e-sāda
jo samjho to fasāna-sāz bhī hai

hai ye tash.hīr-e-mohabbat to kahīñ ba.ad kī chiiz
aap mil sakte haiñ duniyā ko ḳhabar hone tak

jab hunar us kī mohabbat kā khulā mujh par 'sabīn'
qaid us ne ghar kī dīvāroñ meñ mujh ko kar diyā

bīmār-e-mohabbat thā sivā apne na koī
ik mustahiq-e-sharbat-e-dīdār hamīñ the

bad-nām mohabbat ne tirī ham ko kiyā thā
rusvā-e-sar-e-kūcha-o-bāzār hameñ the

da.avā kiyā thā zabt-e-mohabbat kā ai 'jigar'
zālim ne baat baat pe taḌpā diyā mujhe

kuchh na thā yaad ba-juz-kār-e-mohabbat ik umr
vo jo bigḌā hai to ab kaam ka.ī yaad aa.e

is sarv-qāmat ke josh-e-mohabbat meñ az-bas ki āzād sab señ huā huuñ
mānind-e-qumrī badan kuuñ lagā rā kah yaahū ke dam bhar malañgoñ meñ rahiye

galī kā aam sā chehra bhī pyārā hone lagtā hai
mohabbat meñ to zarra bhī sitārā hone lagtā hai

mohabbat kī adālat bhī bhalā kaisī adālat hai
ki jab bhī uThne lagte haiñ pukārā hone lagtā hai

jo bujh sake na kabhī dil meñ hai vo aag bharī
balā-e-jāñ hai mohabbat meñ fitrat-e-basharī

jo chāhe bhare maiñ ne musavvir se kahā thā
kuchh rang-e-mohabbat mirī tasvīr meñ aave

kitne shorīda-sar mohabbat meñ
ho ga.e kūcha-e-sanam kī ḳhaak

mohabbat niilā mausam ban ke aa jā.egī ik din
gulābī titliyoñ ko phir sahārā kaun degā