Tags-Mohabbat

tirī mohabbat kī ḳhair jis ne jalā ke ḳhāshāk-e-jism-o-jāñ ko
vo aag bhaḌkā.ī jis ne patthar ko ābgīna banā diyā hai

na daulat kī talab thī aur na daulat chāhiye hai
mohabbat chāhiye thī bas mohabbat chāhiye hai

kuchh mohabbat meñ ajab sheva-e-dil-dār rahā
mujh se inkār rahā ġhair se iqrār rahā

kahāñ kā ishq aur kaisī mohabbat
havasnākī kī ik manDī sajī hai

mohabbat hai ki vo aks-e-masarrat
utar aayā mire qalb-e-hazīñ meñ

bahut kuchh pāoge duniyā meñ pyāre
mohabbat pāoge lekin hamīñ meñ

ai 'sirāj' ātish-e-mohabbat meñ
dil kuuñ apne kabāb dekhā huuñ

mumkin nahīñ vo chāhne vāloñ ko na chāheñ
iḳhlās-o-mohabbat kā asar bhī hai koī chiiz

betāb udhar aap pareshān idhar ham
aapas kī mohabbat kā asar bhī hai koī chiiz

kahā na thā ki mohabbat kā tazkira na karo
kise ḳhabar thī ki me.arāj-e-zindagī kyā hai

chāhtā hai jo mohabbat meñ tarāmīm na.ī
merī āvāz meñ āvāz milā saktā hai

ye kaisā daur-daura hai qalam-rū-e-mohabbat meñ
butoñ kā hukm chaltā hai ḳhudā kī baat hotī hai

bahut ghāTe meñ hai urdu zabāñ kyoñ
mohabbat kī zabāñ hote hue bhī

kahīñ kahīñ se mohabbat vasūl hone lagī
duā jo kī hī nahīñ thī qubūl hone lagī

sadā-e-zarf to kānoñ meñ gūñjtī hī nahīñ
'niyāz' phir ye mohabbat meñ vahshateñ kaisī

TuuTe na magar silsila-e-daur-e-mohabbat
mujh ko na pilāo to piye jaao tumhīñ aur

ġhair bhī sūñgh liyā karte haiñ aksar 'shārib'
ik mohabbat tirī har baat ke ā.īne meñ

ek zindān-e-mohabbat meñ hue ham bhī asiir
ḳhud ko har qaid se āzād kahāñ tak karte

yā ḳhudā ham ko ādmiyat de
mulk aur qaum kī mohabbat de