Tags-Mohabbat

maujzan rahtā thā tūfān-e-uḳhūvat ai 'mauj'
dil meñ tūfān mohabbat kā basā thā pahle

shā.erī kā koī andāz samajhtā hai inheñ
vo mohabbat kī rivāyāt samajhtā hī nahīñ

tarab kā rañg mohabbat kī lau nahīñ detā
tarab ke rañg meñ kuchh dard bhī samo leñ aaj

mohabbat meñ nahīñ hai ibtidā yā intihā koī
ham apne ishq ko hī ishq kī manzil samajhte haiñ

bahut mushkil zamānoñ meñ bhī ham ahl-e-mohabbat
vafā par ishq kī buniyād rakhnā chāhte haiñ

hai mohabbat sab ko us ke abru-e-ḳhamdār kī
hind meñ kyā aabrū baaqī rahī talvār kī

vo ḳhudā kā dost hai aur dost hai us kā ḳhudā
kyuuñ na ho 'nāsiḳh' mohabbat haidar-e-karrār kī

ta.alluq jo palTā to jhagḌā banā
mohabbat jo badlī to kad ho ga.ī

vo biij koī batā de kahāñ se laanā hai
mujhe to baaġh mohabbat kā ik ugānā hai

jis kī buniyād mohabbat kī ho zāmin 'sumbul'
aisā ik shahr yahāñ koī to ābād kare

bharam sab khol ke rakh dūñgā masnūī mohabbat ke
koī taaza fasāna dasht-o-mahmil se nikālūñgā

vo muskurā ke mohabbat se jab bhī milte haiñ
mirī nazar meñ hazāroñ gulāb khilte haiñ

talḳhiyāñ is meñ bahut kuchh haiñ mazā kuchh bhī nahīñ
zindagī dard-e-mohabbat ke sivā kuchh bhī nahīñ

ham gadāyān-e-mohabbat kā yahī sab kuchh hai
garche duniyā yahī kahtī hai vafā kuchh bhī nahīñ

zarā ai dil mohabbat kā tarāna tez-tar kar de
abhī kuchh imtiyāz-e-kāfir-o-dīñ-dār baaqī hai

jalātā huuñ mohabbat ke diye nafrat ke āñgan meñ
nazar rakhtā huuñ dushman par har ik shorish se Dartā huuñ

badnāmī o barbādī anjām-e-mohabbat haiñ
duniyā meñ rahā 'farhat' rusvā-e-jahāñ ho kar

ab kho chuke ḳhulūs-o-mohabbat jahān se
chāhat vafā se duur haiñ rishte ajiib haiñ

mirī mohabbat meñ saarī duniyā ko ik khilaunā banā diyā hai
ye zindagī ban ga.ī hai maañ aur mujh ko bachcha banā diyā hai