Tags-Mohabbat

vo jis ke paas mohabbat bhī ho, vafā bhī ho
bhalā vo be-sar-o-sāmān thoḌī hotā hai

baal apne baḌhāte haiñ kis vāste dīvāne
kyā shahr-e-mohabbat meñ hajjām nahīñ hotā

mohabbat aur mohabbat meñ ārzū-e-visāl
ham is bahār ko nañg-e-bahār kahte haiñ

thā baḌā ma.arka mohabbat kā
sar kiyā maiñ ne de ke sar apnā

ek lamha bhī masarrat kā mayassar na huā
jaane kis vaqt mohabbat kī rakhī thī buniyād

sirf qasmeñ va.ade haiñ aur vaqt paḌne par
saath bhī nahīñ detā ab koī mohabbat kā

huā hai terī mohabbat kā hausla saaqī
magar garāñ hai qanā.at kā marhala saaqī

hayāt kyā hai mohabbat hai kyuuñ jamāl hai kyā
na hal huā kabhī 'aḳhtar' kā mas.ala saaqī

peḌ ham mohabbat ke dasht meñ lagā.eñge
be-makāñ parindoñ ko dhuup se bachā.eñge

ye sab kahne kī bāteñ haiñ ki aisā ho nahīñ saktā
mohabbat meñ jo dil mil jaa.e phir kyā ho nahīñ saktā

marhabā tum bhī zarūrat se mile
kaun hai ab jo mohabbat se mile

hotī hai laboñ par ḳhāmoshī āñkhoñ meñ mohabbat hotī hai
jab un se nigāheñ miltī haiñ us vaqt ye hālat hotī hai

ye tujh pe falak ne zulm kiyā vo mujh se judā maiñ un se judā
ḳhushiyāñ to manāo ahl-e-jahāñ barbād mohabbat hotī hai

bujhā do sham-e-mohabbat jalā do gulshan-e-ishq
Darā sakegī na āshiq ko ye muhīb nazar

havas-kāriyoñ ko masarrat na kah
mohabbat meñ itnī na kar mastiyāñ

'fānī' ye magar rāh-e-mohabbat kī zamīñ hai
har zarre meñ hai vusat-e-sahrā-e-qayāmat

ye to farmā.iye kyā ham meñ rahegā baaqī
dil agar dard-e-mohabbat se bhī ḳhālī hogā

maiñ vo ik rahrav-e-mohabbat huuñ
jis kī manzil bhī raah meñ guzrī

kyā hai ūñchā.ī mohabbat kī batāte jaao
panchhiyoñ uḌ ke yuuñ hī ḳhvāb dikhāte jaao

yuuñ bhī paiġhām mohabbat kā pahuñch jā.egā
saath insāñ ke parindoñ ko basāte jaao