Tags-Mohabbat

agar jo izn-e-mohabbat mujhe mile 'sā.im'
maiñ rome rome tirā bhī nikhār saktā huuñ

mohabbat meñ jo haare ho to behtar hai palaT jaao
dar-o-dīvār-e-sañg-o-bām sab hī yaad karte haiñ

takmīl-e-mohabbat kartā huuñ kuchh garmī se kuchh narmī se
aaheñ bhī bhartā jaatā huuñ aañsū bhī bahātā jaatā huuñ

bajā sahī ye hayā aur ye ehtiyāt magar
kabhī kabhī to mohabbat meñ hausla kiyā kar

maiñ ḳhud se nibhāne kā ravādār nahīñ thā
ye pahlī mohabbat mire ham-zād kī zid hai

har taur har tarah kī jo zillat mujhī ko hai
duniyā meñ kyā kisī se mohabbat mujhī ko hai

jab lutf thā ki us ko bhī hotā mirā ḳhayāl
'kaifī' ġhazab to ye hai mohabbat mujhī ko hai

ġham-e-mohabbat ke ba.ad aatī hai sarhad-e-iltifāt-e-jānāñ
sharāb kī talḳhiyāñ sahoge to lazzat-e-be-ḳhudī milegī

aaj ke daur meñ mohabbat kyā
kis ne jaanā hai is kī izzat kyā

khulā fareb-e-mohabbat dikhā.ī detā hai
ajab kamāl hai us bevafā ke lahje meñ

tum ne dekhā hai vahī ḳhvāb jo maiñ ne dekhā
is ko kahte haiñ mohabbat kā asar dekheñ to

na kar 'saudā' tū shikva ham se dil kī be-qarārī kā
mohabbat kis ko detī hai miyāñ ārām duniyā meñ

yuuñ to da.avā hai mohabbat kā tumheñ ham se magar
tumheñ jis jis se mohabbat hai hamīñ jānte haiñ

mohabbat kār-farmā hai hamārī
tire chehre kī rañgat boltī hai

vafā meñ jaan luTāne ke ba.ad bhī 'lubnā'
mire ḳhulūs-e-mohabbat pe vaar kis ne kiyā

ham apne dil se mohabbat meñ be-ḳhabar na raheñ
ki hai bahut kisī gustāḳh kī nazar gustāḳh

ham aur zikr-e-mohabbat dil aur shikva-e-ġham
ḳhamoshiyoñ ne tumhārī kiyā magar gustāḳh

bigḌeñ vo ham se ki ham un se sab meñ ik lazzat hotī hai
jiine meñ baḌā lutf aatā hai jab dil se mohabbat hotī hai

dozaḳh ko yahī jannat kar de jannat ko yahī dozaḳh kar de
ham tujh ko batā.eñ kyā hamdam kyā chiiz mohabbat hotī hai

ab is meñ hamārī kyā hai ḳhatā majbūr se haiñ lāchār se haiñ
dil hai to mohabbat karte haiñ tum ho to mohabbat hotī hai