Tags-Mohabbat

jis jagah mohabbat se husn-o-ishq milte haiñ
kaun sī vo duniyā hai kaun sī vo bastī hai

mirī nadīm mohabbat kī rif.atoñ se na gir
buland bām-e-haram hī nahīñ kuchh aur bhī hai

rasm hī shahr-e-tamannā se vafā kī uTh jaa.e
is tarah to na koī ahl-e-mohabbat ko satā.e

apnī zillat kī salīb aap liye phirnā hai
ye baḌā bojh mohabbat ke sivā kaun uThā.e

maiñ to suntā huuñ tumheñ bhī hai mohabbat mujh se
sach kaho tum ko mire sar kī qasam hai ki nahīñ

mohabbat-kushta haiñ ham yaañ kisū paas
hamāre dard kī bhī kuchh davā hai

us ne mujh se mohabbat kī
maiñ ne use apnā siina chhūne ko kahā

maiñ ne us se mohabbat kī
us ne mujhe dil chūmne ko kahā

dariyā-e-mohabbat meñ maujeñ haiñ na dhārā hai
yuuñ shauq-e-marātib ne pastī meñ utārā hai

mohabbat ke safar par jaao lekin
vahāñ har moḌ par ik imtihāñ hai

roz hai dard-e-mohabbat kā nirālā andāz
roz dil meñ tirī tasvīr badal jaatī hai

bujh chuke haiñ mire siine meñ mohabbat ke kañval
ab tire husn-e-pashīmāñ se mujhe kyā lenā

shauq hai tujh ko zamāne meñ tirā naam rahe
aur mujhe Dar hai mohabbat mirī bad-nām na ho

agar ronā hī ab merā muqaddar hai mohabbat meñ
to dāman bhī tumhārā ho mire ashkoñ kī qismat meñ

savālī ho ke maiñ ne tere dar ko baḳhsh dī izzat
nahīñ to kyā nahīñ hai mere dāmān-e-mohabbat meñ

vo aalam yaad hai jab dil khiñchā jaatā thā pahlū se
kashish pahlī sī kyā baaqī nahīñ lafz-e-mohabbat meñ

fareb-e-hijr meñ lamhe sabhī visāl ke haiñ
ga.e dinoñ kī mohabbat ye din malāl ke haiñ

tum hī batlāo ki us kī qadr kyā hogī tumheñ
jo mohabbat muft meñ mil jaa.e āsānī ke saath

ye ham mohabbat meñ lā-ta.alluq se ho rahe haiñ tū dekh lenā
duā.eñ to ḳhair kaun degā salām mumkin nahīñ rahegā

is hathelī pe mohabbat kī lakīreñ haiñ bahut
haañ magar zanjīr meñ uljhā ḳhat-e-taqdīr hai