Tags-Mohabbat

ham to karte the mohabbat bhī ibādat kī tarah
ab khulā 'raḳhshāñ' mohabbat qābil-e-tāzīr hai

tamāsha ahl-e-mohabbat ye chār-sū karte
dil-o-dimāġh aur āñkheñ lahū lahū karte

sitāre is qadar dekhe ki āñkheñ bujh ga.iiñ apnī
mohabbat is qadar kar lī mohabbat chhoḌ dī ham ne

rafta rafta mirī ḳhuddārī se vāqif hoge
abhī kuchh din mire andāz-e-mohabbat samjho

ye bhī ādāb-e-mohabbat ne gavārā na kiyā
un kī tasvīr bhī āñkhoñ se lagā.ī na ga.ī

kisī jatan kī zarūrat nahīñ paḌegī tumheñ
ham aise log mohabbat se TuuT jaate haiñ

mujh ko mai se baḌī mohabbat hai
maiñ ba-sad-ehtirām piitā huuñ

ham ne avval se paḌhī hai ye kitāb āḳhir tak
ham se pūchhe koī hotī hai mohabbat kaisī

saath rahte itnī muddat ho ga.ī
dard ko dil se mohabbat ho ga.ī

dil kī gāhak achchhī sūrat ho ga.ī
aañkh milte hī mohabbat ho ga.ī

tafraqa Daalā falak ne bār-hā
do diloñ meñ jab mohabbat ho ga.ī

ab rāh-e-mohabbat meñ chalnā hai bahut mushkil
is raah kā har patthar kohsār sā lagtā hai

ik haqīqat hai jab vatan kī talab
phir mohabbat kareñ qayāsī kyuuñ

bahut din dars-e-ulfat meñ kaTe haiñ
mohabbat ke sabaq barsoñ raTe haiñ

koī sahīfa samajh ke rakkhā tumhāre ḳhat ko chhupā ke dil meñ
mirī mohabbat ko apne dil meñ hamesha tum lā-zavāl rakhnā

nigāh-e-nāz sab ramz-e-mohabbat kah ga.ī āḳhir
ḳhirad kī parda-dārī kyā kaf-e-afsos maltī hai

naved dī hai ye mahrūmī-e-mohabbat ne
duā kī be-asarī kā zamāna aayā hai

shurū-e-ishq meñ logoñ ne itnī shiddat kī
ki rafta rafta kamī ho ga.ī mohabbat kī

ġham-e-mohabbat hai kār-farmā duā se pahle asar se pahle
batā rahī hai ye dil kī dhaḌkan vo aa rahe haiñ ḳhabar se pahle

ishq karne kā mujhe kahtī hai samjhāo use
mujh sā mazdūr mohabbat bhī nahīñ kar saktā