Tags-Mohabbat

mish.aleñ pyaar aur mohabbat kī
jagmagātī haiñ jhilmilātī haiñ

bahut buland hai is se mirā maqām-e-ġhazal
agarche maiñ ne mohabbat ke giit bhī gaa.e

terī har baat mohabbat meñ gavārā kar ke
dil ke bāzār meñ baiThe haiñ ḳhasāra kar ke

ham bhī dushman to nahīñ haiñ apne
ġhair ko tujh se mohabbat hī sahī

pahle bhī tavāf-e-sham-e-vafā thī rasm mohabbat vāloñ kī
ham tum se pahle bhī yahāñ 'mansūr' hue 'farhād' hue

ik adāvat se farāġhat nahīñ miltī varna
kaun kahtā hai mohabbat nahīñ kar sakte ham

tauhīn-e-mohabbat bhī na rahī vo jaur-o-sitam bhī chhūT ga.e
pahle kī ba-nisbat husn kī ab har baat badaltī jaatī hai

baḌī ajiib ḳhushī hai ġham-e-mohabbat bhī
hañsī laboñ pe magar dil pe choT khaa.e hue

qais ko dosh na do rakhiyo na farhād ko naam
inhī logoñ se mohabbat kī adā zinda thī

yād-e-ayyām ki sahrā-e-mohabbat meñ 'farāz'
jaras-e-qāfila-e-dil kī sadā zinda thī

hasīnoñ ke sitam ko mehrbānī kaun kahtā hai
adāvat ko mohabbat kī nishānī kaun kahtā hai

hazāroñ rañj is meñ 'arsh' lākhoñ kulfateñ is meñ
mohabbat ko surūd-e-zindagānī kaun kahtā hai

mulāhiza ho mohabbat kā zauq-e-nazzāra
jo āshkār thā vo āshkār ho na sakā

mohabbat ḳhauf-e-rusvā.ī kā baa.is ban hī jaatī hai
tarīq-e-ishq meñ apnoñ se pardā ho hī jaatā hai

yuuñ libās-e-bosīda māl-o-zar se ḳhālī hai
be-karāñ mohabbat hai muflisī ke dāman meñ

mohabbat ke dushman haiñ jitne bhī 'najma'
unheñ aa.ina ham dikhāte raheñge

kis qadar taskīn ranjūr-e-mohabbat ko huī
pyaar se dekhā jo us ne zaḳhm ko marham huā

be-dād kā ab shikva bejā hai 'nasīm' un se
thā tum ko mohabbat kā iz.hār hī kyā karnā

ik sitāra saaz āñkhoñ ke kināre bas rahā hai
ik mohabbat naam kī laḌkī badan meñ pal rahī hai

kahīñ ye apnī mohabbat kī intihā to nahīñ
bahut dinoñ se tirī yaad bhī nahīñ aa.ī