Tags-Ahvaal

yā to aane se pahle ghar kā pūchhte ahvāl
aa ga.e to ab kiije ho guzar-basar jaise

lab pe pābandī to hai ehsās par pahrā to hai
phir bhī ahl-e-dil ko ahvāl-e-bashar kahnā to hai

tiflī se piirī tak mire ahvāl sun lenā kabhī
vaqt-e-vilādat hī bahut kosā gayā thā ek maiñ

na pūchh pā.eñge ahvāl-e-bebasī vo bhī
mire laboñ pe agar kapkapāhaTeñ hoñgī

ahvāl se kahā kisī ne ai nek-shi.ār
tū ek ko do dekh rahā hai nā-chār

kisī ko kab vo apne dil kā kuchh ahvāl detā hai
maiñ us se baat kartā huuñ vo mujh ko Taal detā hai

kuchh nahīñ kahnā bhī kah detā hai saarā ahvāl
ḳhāmushī ā.īna-e-hāl-e-darūñ hai yuuñ hai

ai chakvāl se aane vaalo kuchh to hāl-ahvāl kaho
phuul se aariz chāñd se chehre tum ne bhī dekhe hoñge

ġhazleñ to kahī haiñ kuchh ham ne un se na kahā ahvāl to kyā
kal misl-e-sitāra ubhreñge haiñ aaj agar pāmāl to kyā

lab pe pābandī to hai ehsās par pahrā to hai
phir bhī ahl-e-dil ko ahvāl-e-bashar kahnā to hai

ahvāl-e-zindagī meñ hai har shaḳhs ajnabī
chehra koī to mujh ko shanāsā dikhā.ī de

tere ahvāl se 'hasan' baare
us ko thoḌī sī āgahī to hai

kiyā hai pursish-e-ahvāl-e-zaḳhm ne rusvā
ye chaak aur numāyāñ huā rafū ho kar

haal ahvāl kyā batā.eñ ham
koī taklīf hai na rāhat hai

dil-e-ahbāb na madfan pe jalā misl-e-charāġh
phir ga.ī aisī zamāne kī havā mere ba.ad

ahvāl mirā dhyān se suntā thā va-lekin
kuchh baat jo samjhā to kahā maiñ nahīñ suntā

vaqt hai gar to ba-taqrīb-e-iyādat aave
kyūñki bīmār kā tere batar ahvāl hai aaj

ye kisī ḳhvāb kā ahvāl nahīñ hai ki maiñ ḳhvāb
dekhtā ḳhvāb ke andar se nikaltā huā thā

raushan hai kisī aañkh meñ tārīkī-e-ahvāl
ik tāq-e-tamannā meñ dahaktā hai ajab shor

ahvāl-e-dil-e-zār sunāyā nahīñ jaatā
jo raaz ayaañ ho vo batāyā nahīñ jaatā