Tags-Ahvaal

meñ kisī chashm-e-nigah-dār kī had meñ huuñ ki jo
mujh ko vāpas mire ahvāl meñ le jaatī hai

Tuk aa ke dekh tū ai sarv-qad mirā ahvāl
ravāñ hai ġham meñ tire jūebār āñkhoñ se

un kī raftār se dil kā ajab ahvāl huā
ruñdh gayā pis gayā miTTī huā pāmāl huā

jab suntā hai ahvāl mirā yuuñ kahtā hai ayyārī se
hai kaun vo us se ham ko to kuchh jaan nahīñ pahchān nahīñ

pūchhtā kyā hai tū 'bedār' hamārā ahvāl
dām-e-ḳhūbāñ meñ phir ab aa.e giraftār hue

nahīñ ma.alūm mujh par bhī ye ahvāl apnī zaarī kā
ki maiñ misl-e-jaras kis ke liye fariyād kartā huuñ

arz-e-ahvāl-e-dil-e-zār karūñ yā na karūñ
ishq se apne ḳhabar-dār karūñ yā na karūñ

hairāñ huuñ 'mīr' naza.a meñ ab kyā karūñ bhalā
ahvāl-e-dil bahut hai mujhe fursat ik nafas

aayā hai koī pursish-e-ahvāl ke liye
pesh āñsuoñ kī aap bhī sauġhāt kījiye

sab kā ahvāl vahī hai jo hamārā hai aaj
ye alag baat ki shikva kiyā tanhā ham ne

bhūlī-bisrī yaad ne jab daryāft kiyā ahvāl mirā
dil ne zaḳhm kalām kiyā āñkhoñ ne ashk-bayānī kī

dil kā ḳhuuñ āñkhoñ meñ khiñch aayā chalo achchhā huā
merī āñkhoñ ko mirā ahvāl kahnā aa gayā

aap farmā.eñ hijr kā ahvāl
maiñ karūñ zikr vasl kī shab kā

garche zāhir meñ haiñ ahvāl munavvar saare
raqs karte haiñ añdhere mire andar saare

haa.e vo pal na rok sake ashk-e-lāla-gūñ
ahvāl-e-shauq jaan ga.ī anjuman tamām

nā-tavānī kā mirī mujh se na pūchho ahvāl
ho mujhe dekhte yā apnī kamar dekhte ho

ḳhush paate haiñ mujh ko dost 'vahshat'
dil kā ahvāl kaun jaane

dhīmī bārish kī lai meñ ahvāl sunāte rahnā
us kā ek jharoke meñ phir shaal sukhāte rahnā

ham se kyā pūchho ho ahvāl-e-haram ai logo
aaj ke dard kā jaao to mudāvā kar ke