Tags-Ahvaal

hamāre shahr kā ahvāl mat pūchh
hamārā shahr kuufa ban rahā hai

kaun ye pursish-e-ahvāl ko aayā 'tāriq'
lab haiñ ḳhāmosh magar dīda-e-nam bolte haiñ

tālib haiñ sīm-o-zar ke ḳhūbān-e-hind 'saudā'
ahvāl kaun samjhe āshiq kī be-zarī kā

ba.ad yak umr kahīñ tum ko jo tanhā paayā
Darte Darte hī kuchh ahvāl sunāyā ham ne

ajab ahvāl dekhā is zamāne ke amīroñ kā
na un ko Dar ḳhudā kā aur na un ko ḳhauf pīroñ kā

āñkhoñ meñ ruup sub.h kī pahlī kiran sā hai
ahvāl jī kā zulf-e-shikan-dar-shikan sā hai

'jālib' na aa.egā koī ahvāl pūchhne
deñ shahr-e-be-hisāñ meñ sadā.eñ kisī ko kyā

aatī haiñ agar raat ko rone kī sadā.eñ
ham-sā.e kā ahvāl kabhī pūchh liyā kar

miltī to zarā pūchhte ahvāl hī us kā
afsos idhar bād-e-sabā hī nahīñ aa.ī

dekho kyā ho ki vaañ hai nāz-e-ġhurūr
maiñ ye ahvāl-e-ḳhasta huuñ yārab

ahvāl batā.eñ kyā raste kī sunā.eñ kyā
bā-hālat-e-zār aa.e bā-dīda-e-nam pahuñche

haal ahvāl kyā batā.eñ kise
sab irāde ga.e Thikāne lage

ufuq taġhayyur kī tez lau se pighal rahā hai badal rahā hai
magar is ahvāl-e-vāqa.ī ko likheñ na vo mere naam kahnā

kis se yārab kahūñ ahvāl ye kahtā hai vo but
apnī yaañ rām-kahānī na bayāñ kījiyegā

ek vazāhat ke lamhe meñ mujh par ye ahvāl khulā
kitnī mushkil pesh aatī hai apnā haal batāne meñ

kuchh taġhayyur mire ahvāl-e-pareshāñ meñ nahīñ
aise aalam meñ huuñ jo ālam-e-imkāñ meñ nahīñ

na mujh ko kahne kī tāqat kahūñ to kyā ahvāl
na us ko sunñe kī fursat kahūñ to kis se kahūñ

na pūchho muftiyān-e-shar.a kā ahvāl jaane do
tanaffur kufr ko jis se ho vo islām kyā hogā

ham to raat kā matlab samjheñ ḳhvāb, sitāre, chāñd, charāġh
aage kā ahvāl vo jaane jis ne raat guzārī ho

shiddat se lagā hañsne ahvāl pe gar mere
aañsū bhī kabhī Tapke makkār kī āñkhoñ se