Tags-Murder

abtar-e-ḳhūñ-rez hai qatl upar tez hai
zālim-o-saffāk suuñ ḳhuub nahīñ bolnā

aap ne qatl kiyā ḳhair gila mujh ko nahīñ
apne kūche meñ to banvā.iye turbat merī

qatl hote haiñ qatl hote haiñ
ahd-e-dil daur-e-nādarī hī sahī

niiñd jab tak thī mirī āñkhoñ meñ mahfūz thā maiñ
qatl lamhoñ ne kiyā ḳhvāb se bāhar mujh ko

jiite haiñ ārzū-e-qatl meñ ham
dam tire teġh-e-do-dam achchhe haiñ

qatl ho jab tak na sūraj kā khilegī kaise shaam
rañg hī bikhre na to kaise koī manzar bane

qatl kyā ho koī ḳhanjar meñ nahīñ tarz-e-nigāh
daad ai ishq hai jallād gunahgār ki ham

maiñ jahāñ qatl ho rahā huuñ vahāñ
mere ajdād ne hukūmat kī

jo ḳhema-gāh se niklūñ to qatl-gāh talak
paTā huā tire a.azā se rāsta chāhūñ

qatl karnā nahīñ hai mansūba
un kī ḳhvāhish hai mujh ko taḌpānā

na vo sambhāle kisī ke sambhle na vo manā.e mane kisī se
jo qatl-e-āshiq pe aa ke machle to ġhair kā phir na āshnā kā

pā-basta-e-zanjīr-e-havā chhūT ga.e haiñ
mauqūf huā silsila-e-qatl-e-navā bhī

muñh se duā nikal hī ga.ī vaqt-e-qatl bhī
kahnā ye thā ki haqq-e-mohabbat adā huā

'hassān' qatl-o-ḳhūn ke manzar pe kyā likhūñ
har sar dikhā.ī detā hai apnā hī sar mujhe

ḳhud apne qatl kā ilzām Dho rahā huuñ abhī
maiñ apnī laash pe sar rakh ke ro rahā huuñ abhī

'az.har' jo qatl ho gayā vo bhaa.ī thā magar
qātil bhī mere apne qabīle kā fard hai

maiñ sar-ba-sajda huuñ ai 'shimr' mujh ko qatl bhī kar
rihā.ī de bhī ab is ahd-e-karbalā se mujhe

is salīqe se mujhe qatl kiyā hai us ne
ab bhī duniyā ye samajhtī hai ki zinda huuñ maiñ

qatl hone na diyā us kī nazākat ne mujhe
rah gayā apnā sā muñh le ke vo qātil merā

qatl to kar chuke na ho badnām
mere lāshe ko do zamīn meñ gaaḌ