Tags-Murder

qatl kar ke mujhe talvār ko toḌā us ne
ḳhūn-e-nāhaq se pashemāñ na huā thā so huā

qatl ho to merā sā maut ho to merī sī
mere sogvāroñ meñ aaj merā qātil hai

majbūriyoñ ke raaz na khul jaa.eñ ba.ad-e-marg
qātil hamāre qatl kā charchā kiyā na jaa.e

amīr-e-shahr ko bhī qatl kar gayā 'tāriq'
farāz-e-dār pe aa ke ye muskurānā mirā

hasart-e-qatl hī ne jaan lī apnī sad shukr
maut ne ham ko na sharminda-e-jallād kiyā

qatl kā mere kiyā hai ahd to baare
vaa.e agar ahd ustuvār nahīñ hai

shahr meñ to qatl sab kā ho chukā hai
bhej do ab dasht meñ balvā.i.oñ ko

qatl karne meñ takalluf na karo
āḳhir ik roz hameñ marnā hai

sarfaroshī ke andāz badle ga.e dāvat-e-qatl par maqtal-e-shahr meñ
Daal kar koī gardan meñ tauq aa gayā laad kar koī kāñdhe pe daar aa gayā

baat kā zaḳhm hai talvār ke zaḳhmoñ se sivā
kījiye qatl magar muñh se kuchh irshād na ho

jahāñ huā thā basārat kā qatl-e-ām 'nabīl'
vahāñ ik ā.ina-ḳhāna banā diyā gayā hai

zihānatoñ ko kahāñ vaqt ḳhuuñ bahāne kā
hamāre shahr meñ kirdār qatl hote haiñ

qatl se mere vo jo baaz rahā
kisī bad-ḳhvāh ne kahā hogā

vaqt-e-qatl chīḳhā maiñ koī kuchh nahīñ bolā
log merī bastī ke gūñge aur bahre the

qatl-o-ġhārat hai galī kūchoñ meñ
shahr-e-dahshat kā nagar lagtā hai

pūchhtā kaun hai Dartā hai tū ai yaar abas
qatl karne se mire hai tujhe inkār abas

maiñ apne qatl kā shākī nahīñ huā to huā
ye rañj hai ki tire zulm meñ kamī na huī

ki usī ke naam tak aa.e the ye sadā-o-sidq ke silsile
vahī shaḳhs jis ne tire liye kiyā qatl sochtī raa.e kā

saḳht-jānoñ kā qatl khel nahīñ
kuchh dinoñ aur haath saaf karo

jaa.ez hai us kā qatl hamāre hisāb se
jis ne mohabbatoñ ko nikālā nisāb se