Tags-Murder

kyā paan kī surḳhī ne kiyā qatl kisī ko
shiddat se hai kyuuñ aaj tirī teġh-e-zabāñ surḳh

qatl-e-ām jaarī hai
agle paḌāv tak

kyā ta.ammul hai mire qatl meñ ai bāzū-e-yār
ek hī vaar meñ sar tan se judā rakkhā hai

kī mire ba.ad qatl se tauba
āḳhirī tiir thā kamān meñ kyā

ab un pe uñgliyoñ ke nishānāt aur haiñ
har-chand apne qatl ke aale to haiñ vahī

mire dil ko zarā nahīñ tāb-o-ta.ab ki uThā.ūñ tumhārā ye qahr-o-ġhazab
mire qatl meñ der na chāhiye ab tumheñ apne hī jaur-o-jafā kī qasam

shāyad kabhī aisā ho kuchh film sā kar jā.ūñ
kuchh qatl karūñ chun kar aur ba.ad meñ mar jā.ūñ

vo tarīq-e-ḳhauf-o-dahshat par amal-pairā sahī
maiñ ye kahtā huuñ ki qatl-o-ḳhūñ bhī shā.ista rahe

hālāt jab bhī shahr ke filmā.e jā.eñge
parde pe mere qatl kā manzar bhī aa.egā

tujhe hisāb de duuñ tū ne kitnā qatl kiyā
farishta ban ke chale aa kabhī yahāñ kī taraf

apnī galī meñ mujh ko na kar dafn bād-e-qatl
mere pate se ḳhalq ko kyuuñ terā ghar mile

aaj vaañ teġh o kafan bāñdhe hue jaatā huuñ maiñ
uzr mere qatl karne meñ vo ab lāveñge kyā

dast-e-pur-ḳhūñ ko kaf-e-dast-e-nigārāñ samjhe
qatl-gah thī jise ham mahfil-e-yārāñ samjhe

hai apne qatl kī dil-e-muztar ko ittilā.a
gardan ko ittilā.a na ḳhanjar ko ittilā.a

qatl ke kab the ye saare sāmāñ
ek tiir ek kamāñ thī pahle

ab qatl kī ḳhabroñ kā vo aalam hai ki 'arshad'
sun kar koī hairān o pareshāñ bhī nahīñ hai

baat kyūñ-kar bane zāhir meñ to farmāte ho lutf
qatl bātin meñ ġharīboñ ko kiyā chāhte ho

kyuuñ na hue qatl dam-ba-dam āshiq
haiñ bhaveñ zul-fiqār kī sūrat

ik jumbish-e-abrū hī ushshāq ko kaafī hai
kyuuñ qatl ko vo un ke talvār uThāte haiñ