Tags-Musafir

charāġh-e-rāh bujhā kyā ki rahnumā bhī gayā
havā ke saath musāfir kā naqsh-e-pā bhī gayā

bhej kuchh taaza kumak mere musāfir ke liye
phir utartā hai mire dasht meñ lashkar koī

ab kisī rahbar-e-manzil kī tamannā bhī nahīñ
maiñ akelā huuñ musāfir mirī manzil tanhā

har shai musāfir har chiiz raahī
kyā chāñd taare kyā murġh o maahī

yahī samajh lo hameñ tum ki ik musāfir haiñ
jo chalte chalte kahīñ tham rahe rahe na rahe

palaT aanā na ho mumkin jahāñ se
musāfir us masāfat par gayā hai

zindagī ye hai ki soyā thā musāfir thak kar
so ke uTThā hai to ab shaam huī jaatī hai

sham.a bhī bujh jā.egī parvāna bhī jal jā.egā
raat ke donoñ musāfir haiñ shajar dekhegā kaun

ek dīvāna musāfir hai mirī āñkhoñ meñ
vaqt-be-vaqt Thahar jaatā hai chal paḌtā hai

dekho aisā ajab musāfir phir kab lauT ke aatā hai
dariyā us ko rasta de kar aaj talak pachhtātā hai

naav do-laḳht ho ga.ī ik din
do musāfir the do kināre hue

pahuñch saktā nahīñ vo apnī manzil pe kisī sūrat
vo bad-qismat musāfir jis meñ kuchh dam-ḳham nahīñ hotā

ab tire shahr meñ ā.ūñgā musāfir kī tarah
saya-e-abr kī mānind guzar jā.ūñgā

fitrat ke musāfir ko bas meñ rakh sakte nahīñ ashjār-e-chaman
aatā hai zamāna phūloñ kā jaatā hai zamāna phūloñ kā

khiḌkī se maiñ ne bāhar dekhā hai ik musāfir
dahlīz par vo baiThā bhīgā huā akelā

ye ishq hai samundar phailā huā jahāñ meñ
mujh sā hai ik musāfir bhaTkā huā akelā

'jāmī' vatan meñ apne musāfir thī zindagī
london meñ bin-bulā.e hue mehmāñ se ham

maiñ ne jo chiiz gañvā dī use hiirā kah ke
kisī nādār musāfir ne uThā lī hogī

takiye meñ aadmī ko lāzim kafan hai rakhnā
baiThā rahe musāfir raḳht-e-safar sambhāle

mere junūñ ko zulf ke saa.e se duur rakh
raste meñ chhāñv pā ke musāfir Thahar na jaa.e