Tags-Musafir

jis kī ḳhāmoshī se niklā hai sahar kā sūraj
ham musāfir haiñ usī shab ke tamāshā kyā hai

kidhar ko ruuTh kar jaatā rahā ahd-e-shabāb apnā
na paayā is musāfir ko hazāroñ kārvāñ DhūñDhe

kahāñ gum ho gayā hai rāste meñ vo musāfir bhī
na kuchh rahzan batāte haiñ na kuchh rahbar batāte haiñ

vo mahz dhuup kā musāfir thā
ham-safar āftāb thā us kā

mutma.in huuñ rah-e-isyāñ meñ tirī rahmat se
vo musāfir huuñ ki tashvīsh-e-safar kuchh bhī nahīñ

itne be-mehr mausamoñ meñ bhī us ne had kar dī mehrbānī kī
kiyā mehmān mujh musāfir ko aur phir dil se mezbānī kī

kise ḳhabar thī
ek musāfir mustaqbil zanjīr karegā aur safar ke sab ādāb badal jā.eñge

ḳheme na koī mere musāfir ke jalā.e
zaḳhmī thā bahut paañv masāfat bhī bahut thī

paas kā musāfir kyuuñ uTh ke duur jā baiThā
naam pūchh lene meñ aisī kyā burā.ī thī

jo musāfir bhī tire kūche se guzrā hogā
apnī nazroñ ko bhī dīvār samajhtā hogā

adhūrī baat hai zikr-e-muqīm-e-shahr-e-junūb
har ik musāfir-e-rāh-e-shumāl hai us kā

ik musāfir ke safar jaisī hai sab kī duniyā
koī jaldī meñ koī der se jaane vaalā

itnā to thā ki vo bhī musāfir-navāz the
majnūñ ke saath the jo bagūle lage hue

merī aañkh ke taare ab na dekh pāoge
raat ke musāfir the kho ga.e ujāloñ meñ

maiñ to ik aisā musāfir huuñ jo thaktā hī nahīñ
apnī manzil se bhī aage koī jaada chāhūñ

maiñ chāñd raat kā bhaTkā huā musāfir thā
añdherī raat meñ tanhā kiyā safar maiñ ne

mohabbatoñ kī masāfat se kaT ke dekhte kyā
musāfir-e-shab-e-hijrāñ palaT ke dekhte kyā

badan-sarā.e meñ Thahrā huā musāfir huuñ
chukā rahā huuñ kirāya maiñ chand sāñsoñ kā

yuuñ hirāsāñ haiñ musāfir bastiyoñ ke darmiyāñ
ho ga.ī ho shaam jaise jañgaloñ ke darmiyāñ

jo hudūd-e-sub.h meñ ruk gayā use ittifāq-e-safar kaho
maiñ vahī musāfir-e-shām huuñ mire rāste meñ sahar paḌī