Tags-Musafir

Thahar na aah mirī jaan le ke chalte ho
safar kare jo musāfir ko zād-e-rāh mile

'nasīm' gaañv kī masjid meñ raat kāTegā
ik ajnabī sā musāfir hai kis ke ghar jaa.e

ḳhvāb 'bedār' musāfir ke nahīñ haq meñ ḳhuub
kuchh bhī hai tujh ko ḳhabar ham-safarāñ jaate haiñ

musāfir ho to sun lo raah meñ sahrā bhī aatā hai
nikal aa.e ho ghar se kyā tumheñ chalnā bhī aatā hai

hayāt ḳhud hai dahān-e-nahañg-e-lā-ya.anī
jo hai adam kā musāfir hai maiñ chalā ki maiñ huuñ

tum mire saath chale ho to mire saath raho
ki musāfir sar-e-manzil bhī bhaTak jaatā hai

ghane daraḳhtoñ ke saa.e kī umr lambī ho
ki in ke nīche musāfir qayām karte haiñ

sust-rau musāfir kī qismatoñ pe kyā ronā
tez chalne vaalā bhī dasht-e-be-amāñ meñ hai

rah-e-hayāt kā maiñ aisā ik musāfir thā
ki jaise shahr kī saḌkoñ se bus kā rishta thā

maiñ vo tanhā subuk-pā musāfir thā takmīl kī justujū
khīñch laa.ī thī ik roz jis ko yahāñ

rah-e-qarār ajab rāh-e-be-qarārī hai
ruke hue haiñ musāfir safar bhī jaarī hai

vo musāfir pā-ba-jaulāñ jaane kyuuñ lab-doz the
ek jaisā dard-e-afsāna sabhī chehroñ pe thā

Thahrā thā aa ke ek musāfir kabhī yahāñ
phir shahr-e-tan ko aag lagā kar chalā gayā

pa jaise rail meñ do ajnabī musāfir hoñ
safar meñ saath rahe yuuñ to ham tumhāre bhī

maiñ musāfir huuñ kohna rasmoñ kī
mere aage rah-e-qabā.il hai

mujhe qayām kahāñ ab mujhe talāsh na kar
hai merā naam musāfir safar meñ rahtā huuñ

ma.ānī manziloñ aur rāstoñ ke hai tab hī
ki lauTne ko musāfir ke koī ghar to ho

badan-sarā.e meñ Thahrā huā musāfir huuñ
chukā rahā huuñ kirāya maiñ chand sāñsoñ kā

baḌh ke do qadam tū hī us kī piiTh halkī kar
ye thakā musāfir ai rahzanī kahāñ jaa.e

ham musāfir haiñ gard-e-safar haiñ magar ai shab-e-hijr ham koī bachche nahīñ
jo abhī āñ.suoñ meñ nahā kar ga.e aur abhī muskurāte palaT ā.eñge