Tags-Musafir

daf.atan soch ke ik ajnabī jhoñke ne mujhe chheḌ diyā
jaane kab se ye musāfir hai jazīre meñ muqayyad tanhā

harīm-e-mahmil meñ aa gayā huuñ salām le lo
salām le lo ki maiñ tumhārā amīn-e-qāsid ḳhajil musāfir azā kī vaadī se lauT aayā

diyā karte ho tum jis tarah se bal zulf-e-pechāñ ko
musāfir ke liye yuuñ phāñsiyāñ rahzan banāte haiñ

na manzil ko patā hogā na rastoñ ko ḳhabar hogī
musāfir ek din ārām se ghar baiTh jā.egā

ham musāfir aisī manzil ke hue jis ke liye
rāsta zāhir hai lekin fāsla poshīda hai

har uzv musāfir hai nahīñ kuchh safarī aañkh
hai āḳhir-e-shab umr charāġh-e-saharī aañkh

ye dil ajiib musāfir DaTā huā hai abhī
thake thake se qadam aur manziloñ kī baat

isī ke saath chaltī hai ye manzil par pahuñchne tak
ye rāh-e-ġham jise apnā musāfir jaan letī hai

saañs lene ko musāfir kī tarah Thahre the
haa.e us sāya-e-dīvār kā zindāñ honā

vo musāfir thā adam kī raah meñ gum ho gayā
ġham to is kā hai ki ik achchhā sā insāñ kho gayā

laḳht-e-dil aa ke musāfir se Thaharte haiñ yahāñ
chashm hai ham se gadāoñ kī guzar kā takiya

na ārzuoñ kā chāñd chamkā na qurbatoñ ke gulāb mahke
na hijratoñ kā azaab sahte hue musāfir gharoñ ko lauTe

din aa.e ga.e jaise sarā.e meñ musāfir
Thahrī rahī āñkhoñ meñ jo ik raat vo tum ho

dekh musāfir bhuut nahīñ hai
raah kā patta khaḌkā hogā

na tujh bin hosh meñ ham aa.e saaqī
musāfir hī rahe aksar vatan meñ

ek safar patvār kā apnā ek safar paanī kā
aur musāfir tanhā khā gayā maat samundar biich

ishq-e-tanhā se huiiñ ābād kitnī manzileñ
ik musāfir kārvāñ-dar-kārvāñ bantā gayā

jo jā chuke vo musāfir na ā.eñge armān
bas ab to dafn karo nīm-jāñ umīdoñ ko

ik umr gañvā.ī hai usī moḌ pe ham ne
pal bhar ko musāfir jahāñ Thahrā nahīñ karte

hasratoñ kī manzileñ ro.eñgī mere haal par
aise āvāra musāfir kā nishāñ ho jā.ūñgā